2066/2025-2026

Dated, Aizawl 4th November 2025: Vawiin khan Bharat Rural Livelihoods Foundation (BRLF), Rural Development Department, Govt. of Mizoram, United Nations Development Programme (UNDP) leh Mizoram University te huaihawtin, “Roundtable Consultation on Enabling Sustainable Livelihoods in Mizoram” tih thupui hmangin, ram leilung tichhe lo zawnga hmasawnna tluantling kalpui dan tur chungchang te, thingtlang mite hmasawnna tur chungchangte sawi hona hun, ATI Auditorium, MINECO-ah hman a ni a; Prof. Lalnilawma, Rural Development Minister chuan khuallian niin a hmanpui a; Dr. KC Lalmalsawmzauva, Advisor to Chief Minister (Handholding) bakah BRLF atangin Himangshu Das, Programme Officer, Dr Aruna Pandey, Head – Research & MEL leh mithiam dangte an tel bawk.

RD Minister Prof. Lalnilawma chuan hetiang hun buatsaih a ni chu lawmawm a tih thu sawiin, tun huna mite mai ni lo, thangthar lo la awm lehzel turte tan pawh rah duhawm tak a chhuah ngei a beisei thu a sawi a; ei zawnna tluantling, tlo leh kumhlun a awm theihna tur chuan, sawrkar, mimal, pawl leh khawtlangte an tanrual a pawimawh thu sawiin, hmasawnna hnaa ruahmanna siamtute chu, thingtlang mite leh kut hna thawktute an thlir danah, sawrkar scheme chhawrtu (beneficiary) anga thlir satliah mai lova, hna thawhpuite (partner) an ni tih hre reng turin a chah a; thingtlang lama mite leh kut hnathawktute thawhpuina tel lo chuan tunlai thiamna, degree sang tak takte leh technology tha tak takte hian awmzia tak tak a neih loh thu sawiin tualchher thiamna (indigenous skills & knowledge) chawi nun zel a pawimawh thu a sawi a; chutih rualin khawtlang leh mipuite pawh sawrkar hmalaknate tawiawm tha tur leh neitu thinlung pu theuh turin a sawm bawk a a ni.

Dr. KC Lalmalsawmzuava, Advisor to Chief Minister pawhin thu sawiin Mizoram dinhmun leh sawrkar hmalakna hrang hrangte a tarlang a; Shri Kuldip Singh, CEO, BRLF hnen atangin BRLF hnathawh leh thil tum tlangpuite ngaihthlak a ni bawk.

He inkhawmah hian stakeholder hrang hrang, Sawrkar, Civil Society, sumdawngte leh mi thiam, MZU leh ICFAI atangtein an tel a; ram leilung tichhe lo zawnga hmasawnna tluantling kalpui dan tur te, thingtlang mite hmasawn nan a market development leh tualchhung zirna tih changtlun tulnate sawi ho niin, Mizorama mau (bamboo), India rama mau awm zawng zawng zinga zaa 14% lai awmte hi tangkai zawka hman a nih theih dan tur te, industry changtlung zawk din dan tur te, Non-Timber Forest Products (NTFPs), Agroecological Horticulture, leh Integrated Farming Systems (IFS) kalpui theih dan tur leh tunlai thiamna GIS hman tangkai theih dante bakah tlang rama loneitute harsatna hrang hrang - tuihna lo tlem tial tial te, market lama harsatnate leh sik leh sa inthlak (climate change) in a nghawng harsatna chungchangte sawi ho a ni bawk.

Data atanga a lan danin tun dinhmunah Mizoramah lo neia eizawng hi mipui 60-65% an awm nain, thil thar chhuah ten India ram dang a la pha lo hle a; chawhrualin India ramah hactare khatah lo neitute’n 2.5-3 tonnes an thar laiin, Mizoramah chuan hactare khatah 1.73 tonnes chauh loneitute’n an la thar chhuak a; Loneitute thar chhuah, forestry leh fisheries belhkhawm hi State gross value-added ah 27% chauh niin, service sector atangin 46% a ni thung.

BRLF hi Ministry of Rural Development hnuaia awm niin, India ram state 11-ah hna an thawk mek a. A bikin thingtlang mite leh tribal mite’n sawrkar laipui hmalakna hrang hrang zar an zo ve theih nan an thawk thin a ni. BRLF leh Rural Development Department te hian kum 3 chhung Rural livelihood sector-a thawk ho turin May, 2025 khan MoU an lo sign tawh a ni.

Vawiina sawi hona hun hi hetiang hian hun 2-ah then a ni - 

Session 1: Sustainable Livelihoods in Mizoram: Current Experiences and Challenges
Moderator: Professor Benjamin L Saitluanga, MZU
Panellists: 
1) Dr. Zomuankima, COO, MzSRLM
2) Dr. Henry Saplalrinliana, Senior Scientist and Head, KVK
3) Mr Lalramchhuanzela, Executive Director MFM
4) Dr. David C Vanlalfakawma, Assistant Professor, MZU

Session 2: Innovations and Emerging opportunities in value chain development for sustainable Livelihoods
Moderator: Dr Aruna Pandey, Head Research & MEL, BRLF
Panellists:
1) Mrs Lalengzami Haolai, Additional Director(Rtd) Agri Dept.
2) Mr Mark Lalduhsaka, Angel Business Promoters of Mizoram
3) Mrs Zomawii Khiangte, Local All Natural Soda
4) Mr Nicholas Vanlalhumhima, Vinco Farm
5) Mr Zosangliana Tochhawng, MIGA (Mizoram Iskut Growers Association)