451/2022-2023
Dated Serchhip, the 10th May, 2022: Vawiin khan MIZOFED leh Serchhip District Consumer Association tangkawpte buatsaihin LPG a mamawhtute ina thlen sak thlap thlap na tur kalphung (Home Delivery System) kalpui tanna tur hawnna P&E YMA Hallah neih a ni a. Pi Ramdinliani, Director, Food Civil Supplies & Consumer Affairs chu khuallian a ni.

MIZOFED Chairman, Pu K. Rothangpuia kaihhruaiah hian khuallian Pi Ramdinliani chuan, ram chhung khawpui dangah Home Delivery System mai ni lo Pipeline Connection te hial hmanga eirawngbawlna gas an lak tawh laia Serchhip P&E Veng bik tana Home Delivery System hawnna hun hman a la ni ve chauh chu lehlam zawnga ngaihtuah chuan hmabak kan la ngahzia tilangfiahtu a tling a ni, a ti a. Delivery hnate phei chu Mizote thiam chi tak hna niin a hriata, kan tih theih loh bikna chhan tur hi a awm reng reng lo a ni, a ti a. Tun hnaiah Covid-19 hrileng avangin LPG mai ni lo, chawhmeh leh eitur hrang hrang home delivery-a kalpui lo thatzia leh tangkaizia pawh kan hmu theuhvin a rinawm a, khatiang tho khan Gas pawh kan tithei ngei ang tiin Delivery System chu zau zawka kalpui theih a nih a beisei thu a tarlang a. Delivery Charge man atana bithliah Rs 70 chu sang deuh angin lang mahse Rs 70 hi fixed bur a ni lo va, a san theihna ber rate (Maximum Delivery Rate) zawk a ni a, Company, Distributor leh Consumer te atuate mah an chhiat bik lohna tur atana duan a ni, tiin delivery rate chungchang pawh a sawifiah a nu. Home Delivery System in thalaite tan hna a siam belh ngei a rin thu pawh a sawi a ni.

He hunah hian Pu H. Zonuntluanga, President, District Consumer’s Association Serchhip hnen atangin LPG chungchanga mipuite tana District Consumer Association-in hma a lo lak tawh dan tlangpui te, Serchhipa LPG Home Delivery a kalpui anih theihna tur atana Online Booking tihdan an lo inzirtir tawh thute sawiin; sawrkarin delivery rate a bituk zat bur 1 zela Rs 70 chu sang an tih deuh thu leh mahse hun lokal zel turah tun aia rate tlawm/hniam zawk a kalpui chhoh theih an beisei thute a sawi a ni. Pu FC Malsawmtluanga, Branch Manager, Mizofed Serchhip, pawhin thusawiin MIZOFED Managing Director ten rem an tih angin Home Delivery kalpui hna hi vengchhung chinchang hre ber tura ngaih Serchhip P&E Veng Branch YMA ten an kutken tan nghal tur thu a tarlang ni.

Serchhip a LPG Home Delivery hawnna inkhawmah hian DCSO Serchhip & Legal Metrology Department aiawh te, District Consumer Association leh P&E Veng VC leh YMA aiawhte bakah chanchinbu mite an tel a ni.

He hun hi Pu Rinzuala, Managing Director MIZOFED in lawmthu sawiin a khar ani.