Mizoram rawn tlawh mek Election Commission of India Director General Pu Ashish Srivastava chuan vawiin khan Agriculture Committee Room-ah DC, DEO leh tlawmngai pawl hrang hrang aiawhte a kawm a. Kumin kum tawpa Mizoram Assembly inthlanpui chungchang ruahmanna siam dan tur leh inthlan felfai tak neih a nih theih nan Election Commission duhdante a hrilh a ni.

Tunhnaia Mizorama By-Election leh MADC inthlanna neih zawh tak kalpui dante pawh sawichhuakin vawiina meeting-a tel zawng zawngten sorkar, mimal, pawl leh khawtlangin Mizoram chhunga inthlanna felfai leh dik taka tih a nih theihna tura tanlak ho a nih thin dan te an sawi a. Director General Pu Ashish Srivastava chuan Mizorama election felfai leh voter thahnem takin chanvo an nei thin chu lawmawm a tih thu sawiin Election Commission of India-in sawiselna chi hrang hrang hlawh thin mahse vawiin thleng hian tluang taka ram chhunga inthlanna hrang hrang dik taka neih a nih theih nan tan a la thin a, chunvangin a hlawhtlinna te leh mipui ten an aiawh an thlanna turah thil felhlel a awm loh nan theihtawpa hma lak thin a ni tih mipui zawng zawngin an hre tur a ni a; ram khua leh tui dik tak an nih angin thlamuang takin vote thlak zel turin Election Commission chuan a duh a ni, a ti.

Vawiin meeting Mizoram Chief Election Commissioner Pu Ashwini Kumar kaihhruaiah hian Mizoram Assembly Election atan inbiakpawhna tha neih dan tur te, police security te, electoral roll dik tak nei te, video conferencing ruahman te, Voter-te hamthatna te, EVM endik te leh a theih phei chuan tunhnaia Karnataka leh Arunachal Pradesh-a inthlanna neiha an hman ‘wecasting’ thei tura ruahmanna tha siam dan tur an sawiho bawk a ni.