Tukin zing dar 8:00 khan Mizoram Larsap Lt. Gen (Rtd) M.M. Lakhera PVSM, AVSM, VSM chuan Election Commission of India Diamond Jubilee (kum 60-na) lawmnan Aijal Club-ah "India and Election - Photo Exhibition" a hawng. He hunah hian Kishan Ratnani, IIS, Dy. Director, DAVP, Govt. of India leh Mizoram Sorkar mi pawimawh tak takte an tel a ni.

Larsap chuan India rama mipui rorelna dinna atana pawimawh tak mai Election Commission chanchin hmuh theiha tarlan chu thil tha tak a ni a ti a. Hun kal zel atan hlawhtlinna ropui tak an hmuh zel nan duhsakna a hlan bawk a ni.

Election Commission Diamond Jubilee lawmna atana Photo Exhibition hi DAVP, Ministry of I&B, Govt. of India in an buaipui a.  India inthlanpui hmasa ber 1951-52 atangin kum 60 chhunga Election Commission kaldan tlangpui lantirna thlalak hrang hrang te entir a ni. Exhibition hmasa ber chu 25th January, 2010 khan New Delhi-ah buatsaih a ni tawh a, India ram State tinah buatsaih tur niin North East-ah chuan Mizoram-a Exhibition hi  panga-na a ni a. Mizoram hnuah hian Meghalaya leh Tripura ah te an buatsaih leh dawn a ni.

Aijal Club-a Election Commission of India Photo Exhibition hi 2nd Oct, 2010 dar 10:30AM - 5:00PM leh 4th & 5th Oct dar 10:00AM - 5:00PM chhungin a duh apiang tan en theih a ni.

Election Commission of India hi 25th Jan, 1950 ah din a ni a. Hlawhtling taka kum 60 a din chhung hian  Lok Sabha inthlan vawi 15 leh State election, President thlanna, Vice President thlanna leh Rajya Sabha inthlan vawi tamtak buatsaih tawhin India ram hi khawvela democracy ram lian berah a din chhuak a ni.