Kumina Mizoramin State Legislative Assembly Election a hmachhawn turah state inpuahchahna te rawn endik turin Election Commission of India(ECI) hotute chuan karleh, thawhleh ni khian zan khat riakin Mizoram an rawn tlawh dawn a. Hemi chungchangah hian Chief Secretary Pu Arvind Ray chuan Chief Secretary's Conference Hall-ah State Election Department, GAD,SAD, Governor's Secretariat, Finance, Police leh I&PR Department hotute chu thil pawimawh a sawipui a ni.
Full Commission of ECI visit chungchangah Chief Electoral Officer Pu SB Shashank chuan report a pe a. CEO chuan Chief Election Commissioner of India Pu Om Prakash Rawat, Election Commissioner Pu Sunil Arora leh Election Commissioner Pu Ashok Lavasa bakah anmahni puitute Deputy Election Commissioner 4 leh Director General 2 te pawh an rawn kal beisei a ni a ti. Ruahmana awmsa ang chuan ECI hotute chuan October ni 16 khian Aizawl an rawn thleng dawn a. Hemi ni hian meeting an ko nghal a. Political Party aiawhte theuh an kawm hmasa ber dawn a, a dawtah Chief Electoral Officer-in presentation a nei anga, hemi hnuah hian State Police Nodal Officer leh Central Armed Police Force Nodal Officer ten report an pe ve ve leh dawn; a tawp berah District Election Officer cum Deputy Commissioner te theuh leh District Superintendent of Police zawng zawng ten report an pe leh dawn a ni. October ni 17 khian ECI hotute chuan meeting an ko chhunzawm leh dawn a. A hmasaberah Income Tax, State Excise, Banks leh Anti Narcotics Wings( Central & State) an kawm anga. Chumi zawhah Chief Secretary, Principal Secretary(home), DGP, Education Secretary, PWD Secretary, Power Secretary, officer pawimawh dangte leh BSNL hotute an kawm dawn a. Hemi hnu hian Multi Purpose Awareness Van an vailiam anga Chanchinbumite an kawm chhunzawm nghal dawn a ni.