Lok Sabha inthlan atana hmalakna endik turin Election Commission of India atangin Election Commissioner Dr. S.Y. Quraishi leh Dy. Commissioner Dr. Alok Shukla te chu vawiin khan Aizawl an lo thleng.

 

 

Election Commissioner te pahnih hian vawiin chhun dar 2:00 khan Raj Bhawan Durbar Hall-ah political party hrang hrang aiawhte an kawm a. Hemi hnuah DC, SP, RO, ADC, IG leh DIG zawng zawng te nen Mizoramah inthlan muanawm leh felfai tak a awm theih nana district hrang hranga hmalakna leh venhimna lam an sawiho a ni. Election Commissioner te hian Chief Secretary Pu Van Hela Pachuau leh DGP Lalrokhuma Pachuau bakah Aizawl huam chhunga assembly segment 14 atana Observer-a ruat Pi Renila D. Marak te pawh an kawm a ni.

Mizoram-ah hian Lok Sabha leh Assembly by-poll chu a rualin April ni 16, 2009 khian neih a ni ang a. Election hun chhung hian Mizoram leh ram / state dang border te hi khar niin uluk taka venhim a ni ang. Mizoram Lok Sabha leh South Tuipui Assembly by-poll senso atan hian cheng vaibelchhe 13 ruahman a ni.