Mizoram Legislative Assembly inthlanpui lo awm tur atana Candidate te campaign-na sum senso vil tura ruat Flying Squad Team 22, Video Surveillance Team 31, Video Viewing Team 14 leh Accounting Team 14 te chuan vawiin nileng khan I&PR Auditorium ah Training an nei a, Master Trainer pathum - Pu Paul A. Khuma, Under Secretary, R.D., Pu Laltanpuia Hnamte, U/S Finance leh Pu Lalrohlua U/S DP&AR ten heng team hrang hrang te mawhphurhna leh hnathawh dan tur te chipchiar taka inhrilhfiahin an zirho a ni.

Hemi rual hian Static Surveillance Team (SST)-a tel tur Police-te’n Additional S.P. Pu K Lalremsanga hovin Agriculture Conference Hall-ah training an nei bawk a. Assembly Constituency tinah Static Surveillance Team (SST) pathum emaw pali emaw tal Check Post enkawl turin siam a ni dawn a. SST pakhat zelah hian Magistrate leh Police mi leh sa pathum emaw pali emaw an tel ang. SST te hian kawngpui leh khan remchang, State/District ramri-ah emaw Check Post siamin Political Party leh an candidate ten hleihluak takin pawisa leh thamna bungrua, silai leh a mu emaw vantlang tana hnawksak thil engpawh kaltlang tur dangin an hmalakna hi Video Camera-a record vek tur a ni a. Heng video record te hi vantlang mi tupawhin cheng 300 sengin an lei thei ang.

Election Commission of India chuan kum dang zawng aia ngawrhin candidate te sum sen vil hna hi a ngaipawimawh a. Democracy ram a nih anga langtlang leh rualkhai zawka inthlan kalpui a nih theih nan political party leh candidate ten phal chin baka sum sen leh bungraw sem veng turin Election Expenditure Monitoring ruahmanna uluk leh chipchiar takin a duang a. Sum senso vil hna thawk tur hian team leh squad engemawzat a din a ni. Chalfilh bye election-ah khan sum sen vil hna hi kalpui a lo ni tawh a, Mizoram State Legislative Assembly inthlanpuiah chuan a vawikhatna tur a ni.