1496/2026-2027

Kolasib, 23rd July, 2026: Vawiin chawhma dar 11:30 khan DC Conference Hall, Kolasib-ah Special Intensive Revision (SIR), 2026 kalpui mek chungchangah thutkhawm pawimawh tak neih a ni. He hun hi Dr. Lalrozama, IAS, Commissioner & Secretary, H & TE leh Kolasib District atana Electoral Roll Observer ni bawk chuan a hmanpui a. District Election Officer (DEO) Pu H. Dolianbuaia chuan he thutkhawm hi a kaihruai a ni.

Observer , Dr. Lalrozama chuan thu sawiin, Election Commission of India (ECI) chuan Electoral Roll chu a ngai pawimawh hle a, ECI hi thuneihna sang tak nei (autonomous body), a hnathawh daltu awm lova tlang taka hma la thin a nih thu a sawi. He Roll Revision kalpui mek hi mipui thil a nih avangin, vawiina lo kalkhawm District Level Standing Committee member te pawh anmahni hnathawh pangngai nen inmil chiah lo nia hria an awm pawhin, a taka mawhphurhna nei leh pawimawh vek an nih thu a sawi a ni.

Observer chuan Special Intensive Revision (SIR) chungchang sawiin, kum 2005 khan SIR hmasa ber tlangzarh a lo ni tawh a, kum 20 hnuah neih leh chauh a ni, a ti. Kumin a Roll Revision hian kum 2005 a mi nen a inmil em, siam that ngai a awm em tih te endik a ni a, mipuite tan chiai na tur a awm lova, tu pawh vote nei thei tur dik tak E-Roll a an inziahluh theih nana ruahmanna a ni, a ti.

Observer a nih angin thil tih tur bituk emaw, sawisel tura lo kal a nih loh thu sawiin, an hnathawh mekte chu ECI kalphung nen a inmil em tia lo enpui leh puitu zawk a nih thu a tarlang. He Electoral Roll hian India ram bakah Mizoram  tan pawimawhna a nei thuk hle a, nghawng a neih nasat em em avangin Roll thianghlim, rintlak leh dik tak nei turin theih tawp chhuah a tul a ni, a ti bawk.

Thutkhawm kaihruaitu District Election Officer Pu H. Dolianbuaia pawhin thu sawiin, he inthlan bu siam that hnaah hian mitinin mawhphurhna kan nei theuh a ni a ti a. Tun chinah thawktuten theihtawp chhuaha hna an thawk chu a lawmawm hle a ni, a ti bawk.

He hunah hian Pu Chinlianmanga, Election Officer, Kolasib hnen atangin report ngaihthlak a ni a. Report-a a lan danin Kolasib district chhungah hian Assembly Constituency (AC) 3 leh Booth Level Officer (BLO) 94 an awm mek a. Draft Roll tlangzarh takah khan electors zawng zawng 61,340 an awm a ni. Chhan hrang hrang avanga form lak khawm theih loh (uncollectables) hi 3,860 a awm a. Hming inang leh chhan dang vanga felhlel (mapping issues) mi 12,223 te chu enfiahna (hearing) neihpui tan mek an ni.  Gender ratio-ah mipa voter 1000 zelah hmeichhia 1091 an awm a ni.

Pi Lalvenhimi Ralte, Electoral Registration Officer (ERO) pawhin report pe in, SIR hearing hi June ni 21  atang khan neih tan a nih thu a sawi a. Hearing-a lo kal tam zawk te chu an harsatnate chinfel sak nghal zel an ni a, mi thenkhat te erawh document neih kim loh avangin kal nawn tura tih an ni. August ni 5 khian SIR hearing hi zawh hman tum a nih thu a tarlang bawk. Kolasib ERO bakah hian ERO dang atangin report ngaihthlak a ni bawk.

Vawiin thutkhawmna ah hian Sawrkarah Election lama thawktute  bakah, Party aiawhte bakah Kolasib District chhunga MPF,MUP, MJA, MZP leh sawmbik mi pawimawhte an tel a ni.