Vawiin hian Lawngtlai DC Conference Hall ah Lawngtlai District Electoral Roll Revision Observer Pu Thatkunga, MCS hovin meeting neih a ni a, Roll Revision neih mek kalpui dan tur sawi ho a ni.

Election Commission of India thupek angin Photo Electoral Roll 2015 Summary Revision neih mek a ni a, hetah hian nakum 1.1.2015 a kum 18 tling tur chin te tan inziahluhna hun hawn mek a ni. In thun thar duh emaw siamthat duh leh sawi selna nei te tan November 10 thleng hun hawn a ni a, mahni awmna theuh BLO hnenah form siamsa hmanga thehluh tur a ni.

Roll Observer Pu Thatkunga chuan khua leh tui dik tak ten ram hruaitu tur thlanga vote an thlak hi sawrkar nghet tak neih na bul a ni a, vote an thlan theih nan Roll ah an hming a chuan ngei a ngai bawk a, Roll a an chuan vek theih nana thei tawp chhuah hi a pawimawh hle a ni a ti a, Lawngtlai District chu Elector Population Ratio a hniam bik avangin tan lak a tul zual a ni a ti bawk. Chutih laiin khua leh tui dik tak ni lo sawrkar atanga hamthatna duh vanga in thun tum eng emawzat an awm ve reng thei a chung mite dapchhuah leh dan ang taka hmalak kan thlahthlam thiang hek lo, a ti bawk.

Meeting kaihruaitu District Election Officer Pu J.Hmingthanmawia pawh in thu sawiin Lawngtlai District hi International Boundary 2 karcheh a awm a nih avangin ram dang mi helai a cheng hi an tam ve a, Chhiarpui neih a nih khan mihring cheng zawng zawngte chhiar an ni a, amaherawhchu Electoral Roll ah erawh chuan khua leh tui dik tak te chauh thun an nih avangin Elector Population Ratio (Mipui tam dan a zir a vote thlak thei tam lam) hi a hniam lo thei lo a ni a ti a, chutih laiin vote thlak thei khu leh tui dik tak eng emawzat Roll a la chuang lo an awm ang tih hi a rinhlelh awm chuang loh, chu vang chuan chak zawk a hma lak zel tum a ni tiin a sawi.

Meeting ah hian Election lama thawktu te leh Political Party aiawh te, Chanchinbu mite an tel a, Roll Revision kalpui dan tha zawk ni a an hriat hrang hrang te an sawi ho a ni.