3009/2022-2023

Champhai, the 9th December, 2022: Champhai District chhunga Special Summary of Photo Electoral Roll 2023 kalpui mek endik tura Election Commission of India (ECI) in a ruat Electoral Roll Observer Dr. Lalzirmawia Chhangte, IAS, Secretary, School Education & Cooperation Department chuan vawiin khan Champhaia Special Summary of Photo Electoral Roll 2023 kalpui meka hmalaknate a enfiah a; chawhnu dar 3 ah DC Conference Hall-ah election official, political party aiawh leh NGO hruaitute kawmna hun a hmang a, inrawnkhawmna hun hman a ni.

Dr. Lalzirmawia Chhangte chuan Special Summary Revision of Photo Electoral Roll chu India khua leh tui dik tak leh kum tling chinte Electoral Roll-a an chuan ngeina tura hmalakna anih thu leh paih ngai, insawn leh siam that tul dangte buaipuia Electoral Roll dik leh felfai tak puahchahna a nih thu a sawi a. Democracy innghahna bulpui Electoral Roll buatsaih kawngah ECI a duh fir thu leh thil tih dan tharte a awm zel thu sawiin, ECI in hmalaknate a palzam mai mai lova, inkaihhruaina tha tak siamin mipuite hriattur tulte pawh a puangzar zel thin a ni, a ti a. Khua leh tui dik takte Electoral Roll-a an chuan ngei theih nan awlsamna leh remchanna a siam thin thu pawh tarlangin, qualifying date 4 a siam thar a, heng bakah hian kumtluanin continuous updation a kalpui thin bawk a ni, a ti bawk.

Champhai District-a Electoral Roll Revision hmalakna report thehluhte ngun taka a zirchian hnuah lungawithlak a tih thu leh chhuanawm a tih thu a sawi a. Electoral roll revision process chak leh felfai, Mizorama ti tha berte zinga mi an nih thu tarlangin, Official-te bakah anmahni tawiawma thlawp thintu NGO, Political party leh mipuite fakawm a ti a, hmalak lehzelna turah an tawiawmna a ngen a. Khua leh tui dik tak kum tling tawhte Roll-a an chuan chu an chanvo anih thu sawiin, Roll-a lut tur nilote an luh loh nana fimkhur taka kal a tul tel bawk a ni, a ti a. Citizenship leh Electoral Roll chu thil hrang hlak ngaihpawlh loh tur anih thu sawiin, Electoral Roll-ah chuan khua leh tui nihna chiang taka neite chauh an lut thei a ni, a ti bawk.

He hun kaihruaitu District Election Officer Pu James Lalrinchhana chuan Champhai District chhunga Electoral Roll siamthat kalpui mek endik tura lokal Observer chungah District hmingin lawmthu a sawi a. Roll Revision buaipuitu zawng zawngte leh NGO, Political party leh mipuite chungah lawmthu a sawi a. Finchhuah an ngaihna lai leh thurawn pek tul huna dawngsawng turin Election Official-te an inhawn reng thu a sawi bawk.

Pu H.Lalhruaitluanga, Election Officer, Champhai District chuan Special Summary Revision of Photo Electoral Roll 2023 kalpui meka hriat tur pawimawh leh hmabak awmte sawifiahin, form lut leh chinfel tawh dante a report a. Hearing neih zawh fel anih tawh thu leh dilna form dawn tawh zawng zawngte ERONet ah thun vek tawh anih thu a sawi a. Electoral Roll Revision kaltlanga ruahmannate hun bituk chhung ngeia zawh fel vek hman tum anih thu a sawi bawk.

He hunah hian inpawhtlang takin sawihona leh inrawnkhawmna hun hman a ni a. Roll Revision dik leh felfai tak neih anih chhunzawm zel theihna kawnga tul hrang hrang chungchanga ngaihdante inpawhtlang taka sawiho a ni a. Pi Esther Leihang, AERO, 24-Champhai South AC & SDC Champhaiin lawmthu sawiin hun a khar a ni.

Electoral Roll Observer hian Election Office leh Strong Room-te tlawhin a enfiah nghal bawk.

Nimin December ni 8, 2022 thleng khan dilna hrang hrang tan hun hawn a ni a, hemi ni thleng hian Form 6 kaltlangin vote nei thar leh Assembly Constituency (AC) danga atanga luh dilna lut 2,031 a awm a, Form 7 kaltlangin paih dilna lut 775 awmin, Form 8 kaltlangin siamthat ngai dilna lut 356 a awm bawk a, Form 8A kaltlangin AC pakhat huamchhunga insawn dilna lut 719 a awm bawk.

Draft Electoral Roll 2023 tlangzarh takin a tarlan danin Champhai District chhunga Assembly Constituency 3 huamchhunga Polling Station 84 ah vote nei mi 55,301 (mipa 27,036 leh hmeichhia 28,265) an awm a, mipa vote nei aiin hmeichhe vote nei 1,229 in an tam zawk a ni. Assembly Constituency zingah 24-Champhai South A/C ah vote nei mi 20,289 (mipa 9,746 leh hmeichhia 10,543) awmin an tam ber a, 23-Champhai North A/C in dawtin vote nei mi 19,531 (mipa 9,498 leh hmeichhia 10,033) awmin an dawt a, 25-East Tuipui A/C-ah voter 15,481 (mipa 7,792 leh hmeichhia 7,689) awmin vote nei awm tlemna ber a ni.

Special Summary Revision of Photo Electoral Roll, 2023 ah hian qualifying date chu January ni 1, 2023 a ni a, hemi ni a kum 18 tling hman tur India khua leh tui (citizen) dik takte tan Electoral Roll-a inthun dil theih a ni a, hemi rual hian siam that ngai siam, paih ngai paih leh insawn duhte siam fel theihna hun pawh hawn a ni a. November ni 9, 2022 atanga December ni 8, 2022 chhung khan Claims and Objection Period- Electoral Roll-a inthun, paih, insawn leh siam that, dilna thehluh theih hun hawn a ni a, hemi hun chhung hian hearing neih zawh fel vek a ni a. December ni 26, 2022 hmain dilna leh rawtna thlente chinfel vek hman tum a ni a, database siamthat leh supplement chhutchhuahte tihfel anih hnuah January ni 13, 2023 hian Electoral Roll thar ber tlangzarh tum a ni.