3149/2024-2025

Dated Kolasib the 22nd November 2024: Special Summary Revision of Photo Electoral Roll 2025 neih tur atana inpuahchahna kal zelah vawiin khan Electoral Roll Observer, Dr.Lalrozama, Tourism Secretary ni bawk chuan Kolasib tlawh in DC Conference Hall ah Kolasib District Election Officer hovin Election Official te, BLO Party aiawhte leh NGO te nen inkawmhona an nei.

He hunah hian Dr Lalrozama chuan thu sawiin, ECI chuan India khua leh tui ten Inthlan dan kalphung leh a kaihnawih chi hrang hrangte an hriat chu a ngai pawimawh hle a ni, a ti a. Observer te chuan a diklo lai zawn ngawr ngawr an tum a ni lo a, mipuite nena inngheng hnai reng a election kalphung te enho zel a, a fellohna lai a lo awm a nih pawh a siamtha a thawhho chu an ngaih pawimawh zawk a ni, a ti.

Election chungchangah harsatna emaw zawh fiah duh thil te a awm a nih chuan Election official te an awm reng a, Observer te pawh biak pawh theih reng an ni, a ti a. BLO, Party aiawhte leh NGO kalkhawmte hnenah chuan Electoral Roll a thun chungchangah fimkhur taka dan anga thil kalpui a thawhhona tha chhawm nung zel turin a chah.

Kolasib District Election Officer ,Pu Robert.C.Lalhmangaiha pawhin thu sawiin Electoral Roll felfai tak a awm theih nana Election Official te leh BLO/VLO te inpekna ah lawmthu a sawi a. Roll a thun chu thil pawimawh tak a nih avangin uluk angai a, chuvang chuan BLO te leh Election official te chauh nilo, NGO leh party aiawhte pawh thawhhona tha tak an neih a tul a ni, a ti. Kolasib District chhungah, a bik takin tun hnaia VC Bi election leh Sinlung Hills Council Election neih zawh takah mipuite nen thawhhona tha tak hnuaia inthlan ralmuang taka an nei thei chu a lawmawm a tih thu a sawi bawk.

Vawiina Electoral Roll Observer in Kolasib District a tlawhna ahhian Kolasib DEO, Addl DEO, AERO te, Party aiawhte, BLO/VLO te leh NGO aiawhte an te an kalkhawm a, Roll a thun leh paih chungchanga thil tul leh pawimawhte an sawiho a ni.