No.3120/2021-2022
Aizawl Sahmulphah thla ni 24, 2021: Electoral Roll Special Summary Revision neih mek chungchangah nimin khan Electoral Roll Observer Pu K. Lalthawmmawia, IAS, UD&PA leh DP&AR-a Secretary chuan Lawngtlai tlawhin, Electoral Roll siam mek buaipuitu leh a kaihhnawihte meeting a neihpui.
Pu K. Lalthawmmawia chuan electoral roll siamnaah Mizoram chu official, political party leh tlawmngai pawlte thawh hona tha tak avangin a hming tha thin tih sawiin, electoral roll tha, dik leh felfai tak nei turin a awm tur dik takte an awm a, awm lo turte an awm loh nan tan rualna tha a pawimawh a ni, a ti a. Lawngtlai District chu ram dang nen ramri thui tak intawmna a nih avangin thenawm ram atanga lo lut, India khua leh tui ni lote electoral roll-a an chuan loh nan fimkhur a tul zual a ni, a ti.
Electoral Roll Observer hova meeting-ah hian Lawngtlai District Election Officer Dr Andrew H. Vanlaldika chuan Special Summary Revision neih meka hma lakna tlangpui a sawi a. Electoral roll dik leh felfai tak a awm theih nana hma lak chhunzawm dan turte sawi ho a ni.
Special Summary Revision, 2022 kalpui mekah hian draft electoral roll-ah Lawngtlai District-a Assembly bial pathum - Tuichawng, Lawngtlai West leh Lawngtlai East-ah vote nei mipa 42,370 leh hmeichhia 42,717, an vaiin mi 85,087 an awm a. Luh belh, paih, insawn leh siam that duhte tan November ni 30, 2021 thleng hun hawn niin, January ni 15, 2022-ah final electoral roll chu tar chhuah tura ruahman a ni.
Attachment
- Loading attachment...
