Vawiin khan Power & Electricity Department Mizoram sorkar leh Joint Electricity Regulatory Commission for Mizoram and Manipur te tangkawp chuan I&PR Conference Hall-ah electric consumer te vui thu harsatna leh tanpui ngaih huna an harsatna te thlenna tur Dan JERC- M&M (Consumers Grievance Redressal) Regulation 2010 an lo siam tawh chu an sawiho a. He regulation ah hian electric consumer te dikna leh chanvo bakah electric chungchanga harsatna te an thlen dan tur leh P&E Department in a tihtur hrang hrang te pawh tarlan a ni.

Mizoram chhung hmun hrang hrangah mipuiten awlsam zawk an vui thu thlenna tur Internal Grievance Redressal Cell (IGRC) din a ni tawh a. Hemi khaikhawm tur hian Engineer-in-Chief office P&E Department, Power House Complex Electric Veng Aizawl-ah Consumer Grievance Redressal Forum (CGRF) din a ni tawh bawk. IGRC in a chinfel theih loh emaw harsatna thlen tuten an lungawina tawk a chinfel anih loh chuan CGRF ah thlen leh theih a ni bawk. Heng CGRF leh IGRC a mawhphurhtute hi mipuiten an hriat theih nan a zau theih ang berin an in puanzar thin tur a ni.