2468/2025-2026

Dated Aizawl, 1^st December 2025: Vawiin khan Mizoram Sports Council huaihawtin sports lama inkaihhruaina mumal zawk a awm theihna tur leh Mizoram pum dapchhuaka thalaite talent hai chhuahna tura sawrkar hmalakna ‘Empowering Mizoram Sports’ kick-off programme chu Ramhlun Indoor Stadium, Conference Hall-ah hman a ni a; Pu K. Sapdanga, Home Minister chuan khuallian niin hun a hmanpui a, Mizoram State Sports Council Secretary, Pu Henry C. Lalrawnkima’n hun hi a kaihruai a ni.

Home Minister Pu K. Sapdanga chuan thu sawiin Empowering Mizoram Sports (EMS) chu Mizoram tan infiamna lama bungthar pawimawh tak a nih thu a sawi a, sport lama khawvel hriata mizote kan inpho chhuah theihna tura hmalakna pawimawh tak a nih thu sawiin kum 2036-a Olympic games lo awm tur atana inbuatsaihna tur a nih thu te, thalaite ruihhlo leh ngawlveina hrang hrang lak atanga chhanchhuahna tur peng pawimawh tak pakhat a nih tur thu a sawi a; awmze nei lehzuala training kalpuina tura duan inkaihhruaina, Training Manual pawh a tlangzarh nghal bawk a ni.

Vawiin hun hmannaah hian Sports & Youth Services Department hotute, Mizoram State Sports Council hotute leh sports discipline hrang hranga hruaitute leh trainers te an tel a; Pu H. Laldinsanga, Sports Promotion Officer, Mizoram State Sports Council hnen atangin Empowering Mizoram Sports chungchang report ngaihthlak a ni.

EMS chungchanga mipuite hriattur pawimawhte: 

• Empowering Mizoram Sports programme hnuaiah hian Mizoram hmun hrang hrangah kum 8 - 15 inkarte basic coaching pek an ni dawn a, coaching hi ni 15 chhung atan ni tin darkar 3, a vaiin darkar 45 pek an ni dawn a ni. 
• Kum 8-15 inkar target an nih chhan hi, kum 2036-a, taksa leh rilru that vanglai thleng tur 'age group' an nih vang a ni a. Mizote thiam zawng, 2036 Olympic Games-a India ram aiawha an tel ve theihna tur nia ngaih sports discipline hrang hrang 24-te thlan niin category 3-ah hetiang hian then an ni:

• A bul tan nan Category A hnuaia sports discipline-te hi kalpui phawt tur a ni ang a, a tul dan leh fund awm zel dan azirin Category B leh C hnuaia discipline chu telh chhoh tur a ni ang.
• Public-Private-Partnership (PPP) Mode-a kalpui tur a ni a. Sawrkarin coach leh sports equipment a tum ang. 
• Coach duh khua/veng te'n dilna an thehlut ang a, a remchan dan ang Zelin, tumah duhsak bik awm lovin coach-te tirh chhuah thìn an ni dawn a ni. Coach diltu khawtlangin coach-te veivahna (sumo fare), thlenna leh coaching an pek chhunga an ei leh in an tum ve ang. Hei hi khawtlangin neitu nihna rilru an put a, theihtawp an lo chhuah ve theih nana ruahman a ni.
• EMS hi phase wise-a kalpui tur a ni dawn a, phase-1-ah Grassroots Coaching/Talent Identification – ni 15 chhung training kalpui a ni anga, Phase 2-ah chuan phase 1-a training neite tan district leh state level inelna buatsaih tur a ni ang. Phase 3-ah chuan phase hmasa pahnih atanga infiammi thlan bikte residential mode-a coaching/training neihpui tura ruahman niin an tih that dan azirin uluk lehzuala enkawl chhunzawm zel an ni ang.
• EMS hnuaiah hian mizo infiammi Olympic-a tel thei tura talent leh thiamna nei bikte chu scholarship hmanga chhawmdawlna pek tum a ni.
• Empowering Mizoram Sports kalpuina'n 'The Mizoram Bana Kaih (Hand holding) Scheme' hnuaia 'Participative Planning and Innovations for Sustainable Development' component atanga Rs. 2,50,00,000/- (Rupees two crore and fifty lakhs) dah chu sanction a ni tawh bawk.
• Coaching petu tur hi State-level sports association-te nen tangkawpin October thla khan trainer 73 thlan fel an lo ni tawh bawk.
• EMS tha taka kalpui a nih theih nan Consultancy Firm, Angels Business Promoter-te nen thawk ho turin ruahmanna siam a ni a. EMS hi documentation, data, grading system, feedback pekna mumal tak nen kalpui tur a ni dawn a ni. 

Vawiina EMS Kick Off-na inkhawm neih zawh hnu hian ni 5 chhung awh tur ‘Trainers Training’ neih tan nghal a ni.