Union HRD Minister Pi Smriti Irani hnena Association of Qualified Engineers ten Engineering Degree lem pe chhuak thin zirna in hrang hrang lakah fikmhur a ngaih thu an thlen bawhzuiin, Mizoram Police Headquarters chuan March ni 2, 2016 khan District tina Police hotute hnenah lehkha thawnin Mizoram mipuite fimkhur theuh turin a chah.

Police Headquarters chuan an thuchhuahah Association of Qualified Engineers ten Union HRD Minister hnena an lehkha thehluh chu thil telin heng - 1).JRN Rajasthan Vidyapeeth, Udaipur, Rajasthan leh 2). Sandip Jha, Owner of M/S Sandip Foundation, Sandip Academy & Scope Foundation University, Nasik, Mahrashtra te chuan Engineering Degree hrang hrang (M.Tech, B.Tech & Diploma Engineering Courses) te chu ‘DISTANCE EDUCATION’ anga admission lain, heng an hnuaia zirlaite chu ni khat pawh engineering zir uk lovin Degree an pe hmiah hmiah a, a then phei chu an back-date hial a ni tih hmuhchhuah a ni a. Hetiang zirna in lem atanga Degree neite hian sorkar leh private company-ah te hna an hmu a, buaina tam tak an siam phah a ni tih Association of Qualified Engineers chuan an lehkhaah an tarlang.

Lunglei District Police-te pawhin he thu an dawn veleh a rang thei ang berin mipui hriattirna an chhuah a, heng zirna in lem ten Lunglei District chhungah zirlai lak tuma an lo kal a nih chuan fimkhur theuh turin mipui zawng zawng an chah a ni.