Mizoram Chamber of Industries(MCI) leh Indian Institute of Entreprenuership (IIE) tangkawp chuan Ministry of Micro, Small & Medium Enterprises(MSME) bul tumin, Entrepreneurship Development Programme Training chu MUP Building Raj Bhavan bulah vawiin atang khan tan a ni . Pu Joseph Lalhimpuia, Parliamentary Secretary, Industries Department chu Khuallian niin training programme hi a hawng.

Pu Joseph Lalhimpuia chuan Industries lamah hma lakna tur tam tak kan la neih thute leh khawvel thang chho zelah Mizoram pawhin kan ram chhehvel te nena insumdawn tawnna lamah hmachhawp tam tak a neih thute a sawi bawk a. Thalaiten dikna, huaisenna leh rinawmna an neih a, tum ruhna leh taima taka hna an thawh chuan hlawhtlinna an hmu dawn a, an hna thawh apiangah theihtawp chhuah thin turin training te chu a fuih a ni.

Mizoram a Industries kan neih thenkhatte hian Central Sorkar atangin tanpuina sum tam tak an dawng thin a. Kan sum dawn tam ngaihtuah hian thar chhuah erawh sawi tur a tam lo hle thung a, Mizoram GSDP 2012 – 2013 (805308 lakhs) atangin Industries Department (manufacturing) in 8934 lakhs an thawk chhuak a, chu chu 1.09% chauh a ni. He kan kalphung hi kan thlak loh chuan thangtharte leh mi thahnemngaite tan kawng a la ping mai ang tih a hlauh thu a sawi a. Thangtharten tih takzeta an beih chuan sul sutu pawimawh tak an ni thei dawn a, hmasawnna lamtluang zawhna lamah danglamna siam theitu an nih theih tur thu a sawi bawk. MCI lamin training programme tha tak buatsaih nana hma an laknaahte lawmthu sawiin, mi taimaten Sorkar hna ringawt thawh tum lo va, eizawnna hlawhtling an neih theihna tura kawng an lo kawh hmuhnaahte lawmthu a sawi bawk.

Training hian ni 14 August, 2014 thleng a awh dawn a. Training a tel tur hian ITI atangin mi 30 thlan an ni.