No.7227/2020-2021

Vawiin khan I&PR Conference Hall, Mamit-ah Entrepreneurship Development Programme for Migrant Workers, Mamit District chhung a mite tan neih a ni a. Pu Paul Rokima, MIS, DIPRO Mamit chuan khuallian niin training programme hi a hawng.

Training hawngtu Pu Paul Rokima chuan Entrepreneurship-in a tum ber chu eizawnna ngialnghet din tura thil thar risk la ngam, zuan ngam emaw bul tan ngam tih a ni a, Mizote hian sang taka bul tan tum a, ka ramin eng nge min pek ang tih ai chuan kan ram tan eng nge ka pek ang tih hi inzawh nan kan hmang tur a ni a ti. Dinhmun sang taka ding tur chuan hniamte tala bul kan tan ngam a ngai a, bul tanna a awm loh chuan hlawhtlinna a awm theih loh avangin tih tak takna leh taihmakna nena eizawnna kawng zawh tura bul tan ngam turin kalkhawmte a chah a ni. 

Khuallian chuan mihringa kan lo pian chhuah hrim hrim hian kan hlawhtling tawh a, chumi kan hlawhtlinna bawhzui tur erawh chuan mawhphurhna sang tak kan nei a ni a ti. Kan thiltih reng rengah a lai laklawha bansan mai mai lovin kan tuina tak kan thlan fuh thiam a ngai a, kan tum leh duh kan suangtuah ngama kan bawhzui tlat chuan Pathian pawhin mal min sawm ngei ngei thin a ni tiin tha taka training turin duhsakna a hlan bawk. 

Vawiin training hi Pu Lalbiakzuala Aineh, SDIO Mamit chuan kaihruaiin ramdang hmundanga eizawnna kawng zawh Covid - 19 avanga Mizorama rawn lette'n eizawnna kawng an zawhna tura training programme buatsaihsaktu Sawkar chungah lawmthu a sawi a, tha tak leh taima taka training turin kalkhawmte a chah bawk. 

Nithum awh EDP Training-ah hian Pu Ronald Lalnunmawia Royte, Master Trainer chuan zirtirna a pe thin dawn a, Mamit District chhungah hian migrant workers MYC- a in register mi 127 awmin, vawiin training-ah hian Covid - 19 SOP in a phal chinte koh an ni a, training hian 22nd January,  2021(Zirtawpni) thleng a awh ang.