Environment & Forest Minister Pu H.Rohluna chuan, “Kan tu leh fate chenna tlak ram hring nuam siam turin vawiina nu leh pate hian mawh kan phur a ni,” a ti.

He thu hi vawiina Kolasib D.C. Conference Hall-a neih Mizoram ramngaw leh nungcha tinrengte venhimna tura survey leh planning tih dan tur zirhona, Workshop on Survey Technique and Planning for Conservation and Sustainable Use of Biodiversity in Mizoram ah a sawi a. Pu Rohluna chuan central sawrkar hmalakna a Dr. K.D.Singh leh a hoten Mizoram dinhmun chhuichianna research an bei hi a lawmawm hle a ni, a ti a. Zoramin kan ram ngaw hausakna a taka kan hman ngei theih nan thiamna leh ruahmanna fel tak nena khaw tina chengte rawn chunga kan beih tlan a tul a ni, a ti a. Tuna NLUP kan hman tur pawh hi leilung hausakna a taka kan hman ngei theih nan thiamna leh ruahmanna fel tak nena khaw tina chengte rawn chunga kan beih tlan a tul a ni, a ti a. Tuna NLUP kan hman tur pawh hi leilung hausakna a taka kan haichhuah a, eizawnna ngelnghet kan neih theih nan mitin kan tan ho a ngai a ni, a ti. Mizoram chu sumdawnna hmunpui ni turin Zokhawthar leh Bangladesh ah te pawh ruahmanna fel tak Pu Lal Thanhawla sawrkar chuan a kalpui mek a ni, Minister chuan a ti bawk. Khawtlang hruaitute chu thal chho a lo nih dawn tak avangin kangmei ven kawngah i tang tlang hle ang u, tiin a sawm bawk a ni.

Workshop hi Dr. K.D.Singh, Project Investigator, Ashoka Trust for Research in Ecology & Environment, Central Ministry of Environment in a kaihruai a. Project an kalpui dan power point presentation hmangin a hrilhfiah a. Project hi 2007 atang khan thawk tanin Mizoram chu N.E. pumpuiah hemi atan hian thlan a ni a. Mizoram ah Kolasib District chu thlur bing leh in District chhunga khaw 12 chu research beih nan hman leh a ni. An thil hmuh atangin ramngaw a chereu chak hle in a mi cheng tam ber chu eizawnna nghet lo, ram ngaw behchhana ei zawng an ni a. Thingtlang pilrilah ramngaw a chereu zual a, kawngin a tlawhpawh khua te chu huan lo ram nghet nei an tamin ramngaw pawh a tha bik a ni. Mizoram a cheng 80% chu ramngaw hausakna a innnghat an nih avangin ram ngaw thar siam tura hriatna, thiamna leh ruahmanna fel zawk kalpui tha an tih thu project report chuan a tarlang bawk a ni.

Pu Dawngliana, D.C. chuan he hunah hian Minister te, Department hotute leh V.C./YMA kalkhawmte lawmna thu a sawi a. Dr. S.S.Garbyal, PCCF & Secretary, Environment & Forest chuan thu sawiin ram hring nuam leh hrisel siam turin mipui tanrual a ngai a ni, a ti a. Department lam chuan theihtawpin hma a la reng dawn a ni, a ti.

Food & Civil Supply changtu ni bawk Pu H.Rohluna chuan zing lamah Kawnpui Supply Go-Down bakah Bualpui leh Rengtekawn F.C.I. Godown te a tlawh bawk a. Tlai lamah Mualkhang Gas Bottling Plant a tlawh bawk. Heng hmunah te h ian buhfai, gas leh chini ahte sawrkar chuan mipui tana harsatna a awm loh nan tha a thawh reng dawn a, a tul angin surprise checking pawh tih thin a ni ang, a ti a. Buhfai ti pelhe man chhuah an awm chuan ngaihdamna a awm lovang, Pu H.Rohluna chuan a ti a ni.