86/2023-2024

Aizawl, 12th April, 2023 : Vawiin khan Forest Training School, Bethlehem Vengthlang, Aizawl chuan Forest Guard leh Forester thla ruk (6) Training an zawh denchhenin Convocation vawi 23-na an hmang a. Pu RK Singh, PCCF (HoFF), EF&CC Department chuan khuallian niin he Convocation hi a hmanpui.

Pu R. Lalnungrenga, Principal, Forest Training School chuan Convocation inkhawm hi kaihruaiin, Autonomous District Council pathum (CADC, MADC leh LADC) atangin mi 10 theuh leh Tlabung Forest Division atangin mi pakhatin training tha taka zovin, Certificate hlan nghal an ni a. An vaiin pass chhuak te hi Forest Guard mi 18 leh Forester mi 13 te an ni.

Forest Training School hi kum 1974 November khan din a ni a, Forester leh Foresr Guard te training pek thin niin, Forest Training School din tirh atangin Forester mi 305 leh Forest Guard mi 643 train chhuah tawh an ni. Mizoram chhunga Forest Training Institution awmchhun niin, Directorate of Forest Education nen tangkawpin Officer thawk mek te tan Refresher Training Course leh Online Training te pawh buatsaih thin a ni.