3634/2023-2024

Champhai, 2nd February 2023: Vawiin khan Champhai District Mizoram Journalist Association te chuan Annual Conference vawi 36-na Champhai Press Club-ah an hmang a. Er. Ginzalala, Adviser to Chief Minister (Technical) chuan he hun hi uaptu niin a hmanpui.

Er Ginzalala chuan Champhai District MJA ten an hun pawimawh tak hmanpui tura duhsak taka an sawm avangin lawmthu a sawi a. Mipuite khawngaihna changa Champhai North bialtu ni tura thlan a ni chu lawmthu a sawi bawk. Mipui chan ai eiru lo tura a intiamna chu a inchhuanna awm chhun a ni, a ti. Champhai District hmasawnna atan Champhai MJA te nen thawhhona tha zawk neih a duh thu pawh MLA hian sawiin, thuthar thehdarhtute chu ram rawng a bawlna kawngah thawhpuia, finchhuah leh thurawn pe turin a sawm nghal a ni.

Champhai North bialtu MLA ni bawk Er Ginzalala chuan hmasawnna hna thawh kawngah ram changkang zawk te pawhin an tih thin dan angin, ngaihpawimawh hmasak neih a tul a ni, a ti a. Mimal tin te hnenah hamthatna pek vek theih a ni lo tih hre rengin vantlang intawm theih hmasawnna tam zawk thlen thei tur ruahmanna siam a tul a ni, a ti.

Er Ginzalala hian he hunah hian Champhai District hmasawnna tura ruahmanna hrang hrang kal mek leh hmachhawp awm te a tarlang a. Champhai District Hospital tih changtlunna tura sawrkar hmasain hma a lo lak tawh chu tha takin an chhunzawm dawn tih a sawi a. Doctor indaihlohna phuhru turin sawrkarin ruahmanna a siam mek zel thu pawh sawiin, thingtlang mi te harsatna chhawk zangkhai turin Primary Health Care tih changtlun a tul nia a hriat thu a sawi bawk. Tourism hmasawnna atan Aizawl leh Champhai District chhungah Swadesh Darshan 2.0 kal pui a nih tur thu sawiin, he mi atan hian Champhai District-ah khualzin tam thei ang ber hruai lut turin mipuite pawh inpuahchah a tul a ni, a ti a. Commerce & Industries Department hnuaiah Skill Development tih hmasawnna turin Mizoram sawrkarin crore 37 a nei mek tih a sawi a, Champhai thalaite tan a tam thei ang ber hnuh luh a tum thu a sawi bawk. Mizoram sawrkar policy lian ber te zinga mi - ‘Ban a kaih’ (Hand Holding Policy) kalpui dan tur chu peihfel thawkhat a ni tawh a, Planning Department kaltlangin kal pui a ni dawn a ni, a ti. Er. Ginzalala hian Champhai Greater Water Supply Scheme thawm tha turin ruahmanna siam mek a nih thu te, Truck Terminal sawrkar hmasa atanga buatsaih tan chu peihfel thuai anih a beisei thu te, Auditorium changtlung tak sa tura tender chhuah mek a nih thu te, zirna tih hmasawnna kawnga hmachhawp awm mek te a tarlang bawk.

Champhai District MJA Annual Conference vawi 36-na ah hian kum 2024-26 chhunga District MJA hruaitu tur thlanna neih a ni a. District I&PR Department staff ten inthlan hi an buatsaih sak a ni. Champhai District MJA hruaitu thlan chhuah thar te chu:

President: Pu Lalhlupuia
Vice President: Pu C. Lalhnunpuia
Treasurer: Pu C. Lalrinsanga

Executive Member:
1. Pu Lalhmingliana
2. Pu R. Lalfakawma
3. Pu Chanchinmawia Varte
4. Pu Jacob Lalnunhlima
5. Pu ZD Dengliana ; te an ni.