Er H. Lalzirliana, 3-Mamit Bialtu MLA, chuan Dt 4-7 March, 2019 chhung khan a bial chhung West Block huam chhunga khaw hrang hrang Khawhnai, Tuirum, Teirei Forest, Damparengpui, Tuipuibari leh Rajiv Nagar khuate a tlawh.

Pu Zira hi a bial chhung khuate hian parthi nen khawtinah an lo lawm a. Bialtu MLA chuan  Mamit Constituency  MLA atana thlantlin anih angin amah vote tu an ni emaw nilo emaw Bial MLA a ni tih chu bial mipui te'n pawm vek tura chahin , bial tana theihtawp chhuah a tum thu a sawi.

Mizoram Sawrkar chuan hmasawnna hna hmasa ber atan inkalpawhna kawngpui tha siam chu anih dawn thu sawiin, inkalpawhna kawngpui tha neih chu hmasawnna kawng kan zawhna tur atan a pawimawh hmasa ber a ni a ti. Mizoram Sawrkar hnuaiah tun atanga reilote-ah SEDP  kalpui thuai a ni dawn a,  SEDP hnuaiah hian mi harsa/chhumchhia zawkte tan inkhaichhuahna tur a nih dawn thu a sawi a, Mizoram Sawrkar chak tak hmalaknain Aizawl khawpui laili taka awm Assam Rifle Centre chu sawnchhuah thuai tum a nih thu a sawi bawk.

Mamit District Hospital chu khum 100 awm theihna turin DPR 83 crore Approved mai tura peihfel a nih tawh thu sawiin hun reilote ah a chhuah thuai rin a ni a ti. Mamit District-ah HSS Science zirna awmlo chu session thar a tang chuan Science Stream zirna hawn a nih dawn thu sawiin, Teacher la turin Advertisement chhuah a ni tawh a ni a ti. Tribal Girls Hostel sakna turin DPR thehluh a nih tawh thu a sawi bawk. Govt Khawhnai School Building thawmthat ngai chu repair a nih dawn thu a sawi bawk a ni.

Bialtu MLA hian khaw hrang hrang a fanna ah hian khawtlang hruaitute an mamawh an lo thlente chu a hmuna tlawhin a enpuia, harsatna an neihte chu a theih ang angin a chinfel sak nghal a ni. Andermanik leh Khantlang khuate erawh khawchhiat a vangin Bialtu MLA hian a tlawh thei ta lo a ni. School leh NGO te'n an mamawha an hman atan Computer, Silpouline, Volleyball, Net leh Football te a pe bawk.

Pu H. Lalzirliana, Bialtu MLA chuan bial mipuite chu Mizoram Sawrkar hnuaiah thlamuang taka awm tur leh rinna ngat tlat turin a chah nawn  a ni.

Pu H. Lalzirliana, Bialtu MLA hi Mamit District chhunga Sawrkar Department aiawhte te leh khawtlang hruaitu te'n an tawiawm a ni.