1261/2023-2024

Mamit 25th July, 2023 : Vawiin khan Er. H. Lalzirliana, Bialtu MLA/ Vice Chairman Roads & Infrastructure Development Board chuan Mamit District Hospital-in Kayakalp Award, 2022-2023 3rd Prize an dawn lawmna khuallian niin a hmanpui.

Khuallian chuan District Hospital DMS leh Staff te thawhrimna leh inpekna avanga faina kawnga inelna-ah lawmman pathumna hial an la thei chu a lawmpui thu a sawi a, kan nitin hnathawhna kawngah engkim thawk thiam, thawh duhna thinlung nei kan nih a tul thu sawiin thawhhona tha tak hnuaia District Hospital-in Award a dawn chu chhawm nung zel a, Building hlui zawka lawmman lak theih a nih chuan Hospital building thar sak zawh tepah phei chuan lawmman hlu zawk an lak theih ngei a beisei thu a sawi bawk. Kan nitin hnathawhna leh nun hona kawngah kan nihna/kan tihturah kan chiang tur a ni a, kan mihringpuite chunga kan tihtur kan hlen hi kan hna leh rawngbawlna nena inzawm tlat a nih avangin District Hospitala thawkte thahnemngai leh phur taka hna thawk turin a chah a ni.

Bialtu MLA chuan kan thenawm ramah kan zo hnahthlak unaute'n harsatna namailo tak an tawh avangin pawi kan tihzia leh tawrhpuina lantir nan mi tam takin vawiin khan kawng kan zawh a, Mizoram chu zofate inpui, tlukluhna kan nih angin, kan unaute lo dawnsawn kawngah theihtawp kan chhuah zel a tul a, Sawrkar ang pawhin theihtawpchhuah zel a ni a ti bawk.

Khualzahawm Dr. Lalnuntluangi Khiangte, Dy.CMO pawhin thusawiin Health Department tana inelna lian Kayakalp-ah Mamit District Hospital Staff indaih lo tak chung leh Building hlui lam tawh a ni chunga, fai inelna-a lawmman pathumna hial an la thei chu a lawmpui thu a sawi a, an kal lehzelna turah duhsakna hlanin a pawimawh ber an damlote tana damna ni zel turin duhsakna a hlan bawk a ni.

Kayakalp Award hi Mizoram puma Sorkar Hospital-te faia inelna niin Mamit District Hospital hian kum 2015 khan Kayakalp lawmman pathumna hi an lo dawng tawh a, kumin hian dawn leh a ni. Kayakalp hnuaia hmalakna-ah hian Hospital duty te'n mahni hna theuh an thawh duhtawk mai lovin, faina leh thianghlimna kawnga hmasawnna a awm theih nan Team anga kalpui a ni a, chungte chuan hma nasa takin an la a ni. Mamit District Hospital hian tehfung hrang hrangah lawman chi hrang hrang a dawng thin a, thawktute inpawhthatna leh hmalakna a zarah Best Team Award 2019-2020 khan dawn a ni tawh bawk a ni. Kayakalp Award denchhen hian District Hospital hnuaia thawkte hmasawnna lawmman/Award, Best Staff Nurse Award, Best Supporting Staff Award leh Best Group D Award- te buatsaih a ni a. Best Staff Nurse-ah hian Lalhlimpuii Hmar niin Best Supporting Staff Award hi Linda Zonunsangi'n dawngin, Best Group D Award hi R. Lalnunmawii hnenah hlan a ni bawk.

Vawiin Award lawmna hi Auditorium, ANM School-ah neih niin Dr. Lalrinfela H, DMS chuan a kaihruai a, Dr. Hrangkapzawna, MO chuan lawmthusawina a nei bawk.