Vawiin khan Er H. Lalzirliana Bialtu MLA chuan Mamit Primary School II Golden Jubillee lawmna khuallian niin a hmanpui.

Khuallian chuan Mamit P/S II te'n Jubillee lawm thei hiala an awm chu Zirtirtute leh he Schoola lo lut tawh zawng zawngte a lawmpui thusawiin Jubillee chibai a buk a. Hun lokal lehzel turah pawh Jubillee dang zel hmang turin duhsakna a hlan a ni. Amah ngei pawh Mamit naupang niin tun dinhmun thleng tur hian Mamit chu a zirna bul tanna a nih thusawiin, he hmun atang hian hna sang zawk leh ropui zawk inchherchhuak turin hmun a awm a ni a ti. Bialtu MLA chuan eng hna pawh thawk ila rinawm tak leh lungawi taka  kan thawh chu malsawmna kan dawn na ber a nih thu a sawi.

Pu Zira chuan eng hna-ah  pawh hna hniam leh sang a awm chuang lova, kan hnathawh san leh hniam chu hlawhtling tehna hmanrua  ni lovin a thawktu kutah  hlawhtlinna tak tak zawk chu a awm thu a sawi. Zirtirtute chu naupangte entawn leh ngaihsan in ni a, chuvang chuan uluk taka nun hmanga zahtlak ni turin zirtirtute kalkhawmte a chah bawk a ni.

He hun hi Pi R. Lalnunthari, District Education Officer, Mamit chuan khualzahawm nia hmanpuiin thusawina a nei bawk.

Govt P/S II Golden Jubillee lawmna hun hi Pu H. Lalthlengliana, Chairman Organising Committee chuan kaihruaiin, he School-a Headmaster hna lo thawk tawh tute hnen atanga thusawiin ngaihthlak niin Jubillee puala buatsaih Souvenir chu Pu Lalsailova, DPC SSA, Mamit District chuan a tlangzarh bawk a ni.

He hunah hian he School-a lo thawk tawh zirtirtute bakah Govt P/S II zirlai chhuak naupang mi thahnem tak an tel a ni.