357/2022-2023
Dated Serchhip, the 29th April, 2022 : Mizoram Assembly Dy. Speaker, Tuikum bialtu MLA ni bawk Er.Lalrinawma chuan vawiin khan a bial chhung khua Sialhau khua tlawhin, MLA fund bul tuma an khaw chawmtu tur Tuivamit tui pump na an bun fel chu Village WATSAN Committee kutah a hlan.

Sialhau khuain tui a harsatna an neih nasat thin avangin Er. Lalrinawma hian MLA fund hmanga bul tumin khua atanga kilometer khat leh a chanve vela hla a mi Tuivamit luite tui pump-na tur khawl leh mamawh dangte a ngaihtuah saka, khawl hi hmun hnihah bunin tui hi ft.1000 a sang ah pump chhoh a ni. He khawl chawm nan hian P&E department ten Transformers an bun sak bawk.

Hun engemaw chen enchhinnate neih a nih hnuah tluang taka kalpui theih nia hriat a nih tak avangin bialtu MLA hian Sialhau Village WATSAN Committee ah a hlan ta a ni. Er. Lalrinawma hian Sialhau khawtlang tanrualnaah lawmthu a sawi a, khawtlang bungruate mahni tâ anga en a, uluk taka lo enkawl tlat turin mipuite a chah a ni.

Tuia an harsatnate MLA in a sutkian sak ta hi Sialhau Khawtlâng mipuite an lawm hle a ni.