3726/2022-2023
Aizawl the 1st March, 2023 : Vawiin khan Women & Child Development Minister Er. Lalrinawma chuan a Office chamber MINECO-ah International Women’s Day -2023 hawnna hun a hmang.

Minister Er. Lalrinawma chuan International Women’s Day hawnna thusawiin Kum 1975-ah khan United Nations pawhin a hmasa ber atan he Hmeichhiate Ni hi a lo hmang tan a, chu mai ni lovin Kum 1977-ah UN chuan a member ramte hnenah kumtinin an ram tih dan phung milin March ni 8 hi Hmeichhiate dikna chanvo leh khawvel remna ni a hmang turin a rel ta hial a ni, a ti. UN Woman Gender Snapshot 20chumabkiya report dan chuan hmeichhiate digital hmasawn lama mipate aiin nasa takin an hnufual a, hei hian a bik takin ram hnufual zawk leh thang laiah nasa takin suma leh pai, ei leh bar dehchhuahna kawngah nghawng a neih thu sawiin kum 10 kal ta chhung khan trillion khat(1) zet hloh a ni, Minister chuan a ti a. Hetianga hmeichhiate hlamchhiah an nih zui zel phei chuan kum 2025-ah meuh chuan Trillion 1.5 lai hloh leh thei dinhmunah an ding a ni tih a tarlang bawk.

Er. Lalrinawma chuan nu leh hmeichhia te dinhmun pawimawh zia sawiin an ngaihsan zawng hian khawngtlang thleng a nghawng avangin an ngaihsan zawng thlang fimkhur turin a chah a. Mizo hmeichhia chhuanawm tam tak an awm thin chu fakawm a ti a, hmeichhia te Pathianin a siam dan chu ropui tiin hmeichhe chawisang ram leh hnam apiang hmasawnna ah hmahruaitu an ni thin, Minister chuan a ti.

Kum 1966 atangin vawiin ni thlengin International Women’s Day hi hman chhunzawm zel a nita a, thupui atan "Hmasawnna thil thar leh khawl hmanga thiamna te hmeichhia leh mipa intluk tlanna atan" tih chu hman  a ni. Vawiin programme ah hian Women's Day puala thuchah leh intiamna sawi rual a ni.

He hun hi  Pu Madhup Vyas, IAS, Commissioner & Secretary, Social Welfare & Tribal Affairs Department-in kaihruaiin Pi Lalrammawii Kawilam Assistant Director & Nodal Officer(Mission Shakti) in report leh kal khawmte hmel hriattirna neiin Pi Zoramthangi Chhangte Joint Director, Women & Child Development-in lawmthu a sawi a. He hun hi State Hub for Empowerment of Women, Women & Child Development Govt. of  Mizoram bul tuma hman a ni a, Mizoram chhunga hmeichhe pawl hrang hrang aiawhin he hun hmanna ah an tel a ni.