509/2023-2024

Mamit 19th May, 2023 : Er. H. Lalzirliana, Mamit bialtu MLA, Vice Chairman, Road & Infrastructure Development Board chuan vawiin khan Mamit DC Ground-a Sadbhav Mandap building thar chu khuallian niin a hawng.

Khuallian chuan thu sawiin Mamit leh Lawngtlai District chauhin kan neih theih Mizorama a hmasa ber tur Multipurpose Community Centre hawn a ni ta chu thil chhinchhiahtlak leh lawmawm tak a ni a, Mamit khawpui leh a chhehvel khuate'n kan tangkaipui a, a enkawl zui kawngah neitu rilru kan put a tul thu a sawi. Ramin harsatna namailo tak a tawk chho a, hrileng leh harsatna dang dang kan tuar chho mawlh mawlh chunga hmasawnna hna hrang hrang a kal chho ve zel chu lawmawm a tih thu a sawi a, Pathianin kan mamawh tawk zelin hmasawnna hmel min hmuhtir a, lo la thleng tur nghahhlelh lutuk leh kan duh anga a lo thlen mai loh avanga vui mai lo a, rilru hrisel tak pu chunga hmasawnna hmel duhawm zawkte thlir turin kalkhawmte a sawm a ni.

Bialtu MLA chuan a hun taka malsawmna kan dawn a pawimawhin malsawmna tluantling a ni tiin kan thil neihchhunte khawvela a tha ber ni lo mahse a tha tur a ni a. Sadbhav Mandap satu Contractor te pawh theihtawpa a vil thu sawiin Hall tha tak an sak sak avangin an chungah pawh lawmthu a sawi nghal a ni. Mizoram chu kan chhehvela zohnahthlak kan unaute tana inpui a nih angin tunhnaia Manipur buaina avanga kan unau lo hawte buaipuina kawngah Sawrkar bakah NGO hrang hrang leh Kohhrante thawhhona leh lungrualna chu lawmawm a tih thu a sawi bawk.

He hun khualzahawm ni-a hmanpuitu Pu T.C. Pachhunga, Ex- MLA, Vice Chairman, SEDP Board for Sports etc. chuan Multipurpose Community Centre Mamit khawpui leh a chhehvel khuate'n an tangkaipui em em tur hawn a ni ta chu a lawmawm hle a, a building sak hna pawh duhthusama tha a nih thu sawiin, hman deuhah kha chuan Contractor hna chu tha vaklo tur a ngaih a nih laiin tunah chuan hna tha leh rintlak tak hmuh tur a awm ta zel chu hmasawnna lawmawm tak a ni a, Bialtu MLA-in Mamit Bial tana a thahnemngaihna kal zel avangin Mamit khawpui bakah a chhehvel khua-ah Sports Council pawhin hna kan thawk mup mup a ni a ti, heng hmasawnna mita hmutute chu tangkai taka chhawrtu ni tur pawhin duhsakna a hlan a ni.

Pu James Lalramnghaka, A.E, Mizoram State Sports Council chuan technical report pein Multipurpose Community Centre (Sadbhav Mandap) sakna atan hian Pradhan Mantri Jan Vikas Karyakram (PMJVK) atangin nuaih 236:00 sen a ni a, Project cost atanga 90% hi central tum niin 10% hi State sawrkar tum a ni. Ni 18th December, 2021 khan hnathawh tan niin Ni 27th March, 2023 khan zawhfel a ni a. Multipurpose Community Building hi a dung 23.60 m, a vang 12.00 m a zau niin, chhawng thum a ni a, Ground Floor, First Floor leh Second Floor te a awm a, a sak hna hi M/S Zothan Consultancy Services, Luangmual te an ni.

Sadbhav Mandap hawnna-ah hian Pu V. Laldinsanga, Addl DC, Pu Rodingluaia, President, Jt. VC Mamit leh Pu Vanlalchhuanga Chhangte, President, Sub Hqrs. YMA, Mamit te'n thu an sawi bawk.

He hun hi Pu John Tanpuia, MCS, Secretary, Mizoram State Sports Council chuan kaihruaiin Pu H. Laldinsanga, SPO, Mizoram State Sports Council chuan lawmthu a sawi a ni. He hunah hian Sawrkar mi pawimawh, khawtlang hruaitu, Tlawmngaipawl aiawh hrang hrangte bakah thutharthehdarhtute an tel a ni.

Tukin vek khan Bialtu MLA Er.H. Lalzirliana hian Panchayat Bahwan, Mamit Chhimvengah hawngin Mamit Chhimveng VC te'n VC House tha tak an nei chu a lawmpui thu leh a hmunhma petu Hmunsam Presbyterian Kohhran te chungah lawmthu a sawi bawk a ni.