Tunlai hian mi thenkhatin Vote thlakna khawl, Electronic Voting Machine (EVM) hi tihkhawloh theih leh rintlak loh angin Cable TV leh chanchinbu hmangin an thehdarh tih hriat a ni a. He thu thang hi thu dik lo leh belhchiandawl lo a nih avangin Mizoram Sorkar chuan District tin Deputy Commissioner te chu EVM an buatsaih dan kimchang Chief Secretary hnenah report thehlut tura tih an nih angin report hi an thehlut vek a, hetiang hi an hmalak dan a ni :-
1. EVM hi Election Commission of India ta (property) a nih avangin Political Party leh Candidate-te kutah dah a ni ngai lo va, D.C Office-a a dahna tur bik (EVM Warehouse) ah uluk taka kalhin dah that thin a ni.
2. Vote thlakna atana hman a nih hma hian a siamtu Company Engineer-ten EVM khawlin hna a thawh that leh that loh endikna (First Level Checking) an nei hmasa vek thin a. Hetiang hunah hian Observer bakah Political Party tin aiawhte an tel thin a, an signature pawh lak vek thin a ni. First Level Checking- ah hian EVM zawng zawngah vote thlak chhina (mock poll) neih vek thin a ni bawk.
3. First Level Checking (FLC) tih fel vek hnuah inthlannaa hman tak tak tur EVM te chu Candidates Agents te awm lai ngeiin buatsaih fel (commissioned) thin a ni a. Hei pawh hi Election Observer-te hriatpui vekin tih a ni thin.
4. EVM hian Unique Number an nei vek a, inthlan dawn te-ah chauh duty-te pawhin an kalna tur veng leh khua an hriat ang bawkin, EVM te pawh hi khawii Polling Station-a hman tur nge an nih tih hi inthlan peihfel tawh hnu hun tawp lamah chauh Randomise (Presiding Officer ten eng EVM ber nge an chan dawn tih an hre lawk ngai lo) a ni thin. Hemi lai hian Party aiawhte pawh an awm vek a, an hriat fiah duh leh sawisel duhte sawiselna hun pek vek an ni thin. Tin, inthlannaa hman tur EVM te chu Strong Room-ah Guard venna hnuaiah inthlanna tura hman atan chauh dah that nghal an ni a, Training atan pawh “Reserved EVM” lo chu hemi hnu hi chuan hman a ni tawh ngai lo.
5. EVM peih fel sa te chu Presiding Officer-ten an duty-na hmun tur Polling Station theuhah an keng ta thin a. Inthlan ni zingkarah Polling Agent (Candidate aiawh) te nen vote thlak chhinna (mock poll) an neih vek hnuah EVM-a vote tla te chu an paih (clear) leh vek a. Polling Agent-te hmuh lai ngeiin Presiding Officer- te hian an char (seal) thin a, an charna lehkha pawimawhahte chuan Polling Agent-ten hming an sign vek bawk thin.
6. Inthlan zawhah Polling Agent-te hmuh lai ngei hian EVM hi khar (close) a ni a, a bawm (carrying case)-ah an khung leh vek a, an char leh vek bawk thin.
7. Inthlannaa hman EVM-te chu uluk taka siam Strong Room-ah dah nghal vek niin Strong Room hi hmun hnihah kalh (double locked) vek a ni thin a. A kalhna Tala hi puanthem seiin vehkual vek a nih hnuah thalhrit (sealing wax)-in char thin a ni a. Strong Room kawngkharah hian Candidate emaw an aiawhte hming ziak (sign) na lehkha char beh tlat a ni a; Strong Room hawn dawn chuan he lehkha hi a thler ngei ngei a ngai thin.
8. Strong Room hi thuah thumin ven tlat thin a ni a. A thuah chhung berah Central Armed Police Force awmin a dawtah State Armed Police an awm a, a thuah pawn berah Mizoram Police an awm thin. Tin, Strong Room kalh a nih hma pawh hian a chhunga lut Officials zawng zawngte hming, an luh hun leh chhuah hun leh signature lak vek thin a ni a, a chhinchhiahna Log Book hi Security Duty-te hian an vawng tha tlat thin a ni.
9. MLA Election, 2013 lai khan Aizawl-a Strong Room pawn lamah chuan CCTV (video camera te chi) dah vek a ni bawk a; chuvangin Strong Room chhunga luh chu sawi loh, a bula kal ringawt pawh thil harsa tak a ni.
EVM chungchanga thu belhchiandawllo thang vel avang hian tumah lo chi-ai lo tur leh ngaih tha taka in vote hlu tak lo thlak vek turin kan ngen che u a. Inthlanna boruak muanawm tithuanawp zawnga thu belhchiandawllo thehdarhtute hi Cr.P.C Section 107 hmangin hrem theih an ni. Hetianga Deputy Commissioner ten Chief Secretary hnena report an thehluh te hi a duh apiang tan en theih a ni e.
