Vawiin khan Excise & Narcotics Department Minister Dr. K. Beichhua hovin a pisa ah Excise & Narcotics Department officer te leh Central Young Mizo Association (CYMA) hotuten Mizorama ruihhlo hluar zel do let dan tur an sawiho.

Sawihona hun kaihruaitu Dr. K. Beichhua chuan ruihhlo in Mizoram a tuam chhuak hneh hle a a hriat thu leh thingtlang kilkhawr ber ni a an hriat thleng a ruihhlo in a luhchhuah tawh thu a sawi a, kan kan hriatthiam bak a nasa in ruihhlo hian kan thalaite a run mek si a, engtin nge tun aia awmze nei zawk a ruihhlo kan beih let ang tih hi ngaihtuah nasat a tul a ni a ti a. Tlawmngai pawl te leh kohhran hrang hrang ten ruihhlo do kawnga sawrkar tha tichak turin an thawhpui thin avangin lawm thu a sawi a, thawihtawp chhuah pui zel turin a sawm nghal a ni.

Excise Department hotute sawi danin Mizoram Lawngtlai, Saitual, Khawzawl leh Hnahthial tiam lohin District dang zawng zawngah Excise & Narcotics Department in office an neih thu an sawi a. Zu mai bakah ruihhlo a hluar tak zelah chuan thawktute indaihlohna a nasa em em a ni an ti a, tun dinhmunah Excise & Narcotics department a thawktu 441 an awm a, hna ruak hnawhkhah loh 118 a awm tih an sawi a, mi 441 zing atang hian office staff leh driver etc. atan mi engemawzat pawh pen an ngai bawk si a, sawrkarin an dinhmun hria in excise constable engemawzat tunah hian la tura inbuatsaih mek a ni an ti a, hei hian an harsatna a chhawk theih an beisei thu leh constable 50 dang lak belh tura sawrkarah dilna an thlen mek thu an sawi.

Central YMA hruaitute pawhin Excise Department te indaihlohna an hriatthiampui thu leh theihtawp chhuaha ruihhlo do kawngah an puih zel tur thu an sawi a. Excise Department ti chak tura tul ni a an hriat chi hrang hrangte an sawi a, thalai naupang zawkte zingah ruihhlo a hluar lehzual tih an hmuhchhuah thu te an sawi.

Vawiin sawihona ah hian “Ruihhlo Do Core Committee” kaltlanga hmalak ngai te sawi a nih bakah UNO leh International Agency hrang hrangte thawhpui dan ngaihtuah a tul thu te sawilan a ni.

Kumin January thla tir atanga August ni 15 thlenga Excise & Narcotics Department in Narcotic Drugs and Psychotropic Substances Act, 1985 hnuaiah mi 618 an man a, case 470 an ziak lut bawk. Heroin kg 7.235 leh Ganja kg 97.532 an man. Hemi hun chhung vek hian Methamphetamine mum 902424 (kg 99.27) leh Alprazolam mum 2114 an man a ni.