No.6300/2020-2021

Aizawl, the 20th October 2020 : Vawiin khan Excise & Narcotics changtu Minister Dr. K. Beichhua hovin zu khapna dan Mizoram Liquor Prohibition Act 2019 hman hnua dan kalha Mizorama sap zu phurh luh Excise & Narcotics Department in an man khawmte chu Bethany Multipurpose Farm Phunchawng ah leihbuak a ni a. Minister hi AH Vety, Fisheries and Sericulture Board Vice Chairman Pu C. Lalmuanpuia, MLA leh Pu K. Liantlinga Vice Chairman, Social Rehabilitation Board ten an tawiawm a ni.

Dr. K. Beichhua chuan zu leh ruihhloin thalai nun a suat nasat dan leh khawtlang nun a tihchhiat dan te sawiin zu leh ruihhlo dona kawngah Zoram mipuite kan tan tlan loh chuan khawtlang a him dawn lova, zu leh ruihhloin intin a luhchilh ngam tawh a, a te ber atanga a lian ber thlengin a lut ngam a, chuvangin kiltin atanga do hi kan zavaia mawhphurhna a ni, a ti. Excise & Narcotics Department chu force tlem te nei Department ni mahse an hmalakna te chu a fakawmin chhuanawm a tih thu a sawi a. Zu dona kawngah sawisel leh diriam te tawk thin mahse hei hi thalai nun tam tak chhanchhuahna anih avangin Department chuan chak leh zualin Zoram hmelma Zu chu an do zel dawn a ni, a ti.

He hunah hian Pu C. Lalmuanpuia, Pu K. Liantlinga, Commissioner of Excise & Narcotics Pu Ngurchungnunga leh Bethany Multipurpose Farm neitu Pu Zela te pawhin thu tawi an sawi a. Programme hi Deputy Commissioner of Excise & Narcotics Pu Z. Lalhmangaiha'n kaihruaiin Asst. Commissioner of Excise & Narcotics Pu Vanlalrengliana chuan an zu man chungchang report tawi a sawi a ni. Programme zawhah sap zu man khawm te hi leihbuak a ni.

Vawiina sap zu (IMFL) leihbuak hi Whiskey (brand hrang hrang) um puitling (750 ml) 2334 leh um chanve 1143; Rum um puitling (750 ml) um 2523 leh um chanve 84 leh Beer um 56 leh can 243 te a ni a. Tualchhung rate a chhutin hei hi cheng 56,56,400 hu man nia chhut a ni. Heng zu te hi zu khapna dan hman hnua Department-in an man khawmte a ni.