1878/2022-2023

Aizawl 11th September 2022: Nimin khan Excise & Narcotics Department Minister, Dr. K. Beichhua chuan NE Khawdungseia ruihhlo do nana ralven buk hmun 2 a an siam, "No. 4 Check Gate tia vuah" chu tlawhin he hmuna duty mek te nen hun an hmang.

Dr. K.Beichhua hian NE Khawdungsei Branch YMA ten an khua leh Ngopa inkara ruihhlo supply tirem tura ralven buk (check gate No.1) an siam hi a tlawh hmasa a, he hunah hian NE Khawdungsei Branch YMA hruaitute'n Minister hi an lo dawngsawng a, YMA Vice President Pu K.Lalrodinga report pek danin, chhun zan zawmin ni 90 mahni in lum chhuahsana an riah tawh thu tarlan a ni a. Hemi hnuah hian Minister chuan NE Khawdungsei Village Defence Party leh Village council ten an enkawl, Ralven buk No. 2, Khawkawn leh NE Khawdungsei inkara mi a tlawh leh bawk a. VCP Pu Vanlalvuana kaihhruaiin inlawmna hun hman a niin, VDP President, Pu HP Lalrinawma hnen atanga NE Khawdungsei VDP ten chhum lo chat lova ruihhlo do hna kum 50 dawn an kalpui tawh dan te ngaihthlak a ni.

Heng hmun 2-ah hian Minister Dr. K.Beichhua chuan thu sawiin, "Ruihhlo do a tlawmngaia thawk chhuak, cheng khat mah hlawh lo, chawi belh, mahni hna ṭul pawh thawk hman lo, mite nun chhanna a nih avang zawka in volunteer a hmu chu a lawmzia sawiin, Excise & Narcotics Department a enkawl hnua a hlim ni ber a nih hial thu sawi a ni. Minister chuan, "Vawiina kan ṭhalaite run mektu ruihhlo hi kan hriatchian a, a do hna tha thlah lova kan thawh a ngai a ni," a ti. Ruihhlo do naah tanrual a ngaih thu sawiin, mi thenkhat, "Do do mah ulang a rem chuang lovang," tia sorkar deusawhtute awm mah se heng mite hian an hriatchian lohzia sawiin, "Ruihhlo do hna thawk lo phei ilang kan ram hi a chhe lehzual hle dawn a ni," a ti bawk.

Excise Minister chuan, Sorkarin ruihhlo do dan tur ruahmanna felfai tak a duang a, Covid-19 hrileng avangin duhthusamin hna thawk chak thei lo mah ilang nakin lawkah awmze nei zawka do dan tur kalpui a nih tur thu a sawi bawk a ni.

Minister ṭawiawmtu leh Lengteng bialtu MLA ni bawk, Pu L. Thangmawia chuan, Ruihhlo do na kawngah a bialchhung khaw hrang hrang te ṭanlak dan tarlangin, NE Khawdungsei khua bakah Ngopa leh Sialkal tlangdung khua te pawhin ruihhlo tihrem nan ngawrh takin duty an kalpui mek a, hetiang taka hma la nasa hi Mizoram hmundangah an awm a rin loh thu leh, Lengteng bial khaw hrang hrangin ruihhlo do nana thapui an thawhna hian Mizoram hmundang pawh kangkai ngei se a duh thu a sawi bawk.

Minister hian Duty Post No 1 leh No. 2 a duty te tan an thingpui inna tur pawisa a hlan bawk a, Minister hi Lengteng bialtu MLA bakah Social Rehabilitation Board vice chairman Pu K.Liantlinga, Ex-MLA, Pi Zodingpuii, Director Social Welfare & Tribal Affairs, Addl.DC, Saitual Pi Margaret Lalrinawmi Fanai bakah official leh party hruaitu engemawzatin an ṭawiawm a ni.