No.6620/2020-2021
Kolasib 20th November 2020 : Vawiin chawhma khan Excise & Narcotics department changtu Minister Dr. K. Beichhua hovin zu khapna dan Mizoram Liquor Prohibition Act 2019 hman hnua dan kalha Mizorama sap zu phurh luh Excise & Narcotics Department, Kolasib district-ten an man khawmte chu Excise & Narcotics Complex, Khuangpuilam, Kolasibah leih buak a ni a. Minister hi A.H & Vety, Fisheries and Sericulture Board Vice Chairman Pu C. Lalmuanpuia, MLA leh Pu K. Liantlinga Vice Chairman, Social Rehabilitation Board te bakah Pu Ngurchungnunga Sailo, Commissioner leh Pu Z.Lalhmangaiha, Deputy Commissioner, Excise & Narcotics Department-ten an tawiawm a ni.
Minister Dr.K.Beichhua chuan Kolasib district chu state dangte nen ramri intawm leh kalkhan tam tak awmna a nih avangin Excise & Narcotics Department a thawktute pawh hrileng kar a an hna an hlenchhuah thinna chu fakawm a tih thu a sawi a. “Ruihhlo do kawng a ralthuam pawimawh ber chu Ruihlote hi kan ram hmelma, mizo thlalai tam tak nun suattu, chhungkua a buaina leh harsatna chawk chhuaktu a ni tih kan thinlung a kan vawn reng a ngai a ni,” a ti a, ruihhlo vangin chhungtinah buaina a thlen theih avangin Excise & Narcotics Department do tur chauh ni lovin, ruihhlo do chu mi tin mawhphurhna a nih thu a sawi bawk a ni.
Excise & Narcotics department-a thawktu indaih lohna avanga harsatna hrang hrang an hmachhawn mekte chu Minister chuan a hriatpui thu a sawi a, hrileng vang a buaina ten ziaawm lam a pan hunah hmalak thuai tum a nih thu a sawi bawk a ni.
Pu C. Lalmuanpuia, MLA chuan ruihhlo avangin zalenna tam tak a bo phah thin thu sawiin, Khawtlang nun zalen leh muanawm awm theih nana Excise & Narcotics Department Minister leh thawktute hmalakna chu ropui leh fakawm a tih thu a sawi a. Pu K Liantlinga, Vice Chairman, Social Rehabilitation Board pawhin chhungkaw a buaina thlentu ruihhlo dona kawng a hmalakna hian chhungkaw tam tak keh chhe mai tur a ven bakah heng hmalaknate hi nunna hlu tak chhanchhuahna kawng pawimawh tak a nih thu a sawi bawk a ni.
Vawiin Excise & narcotics Complex, Khuangpuilama sap zu man leihbuak te hi Whisky 750 ml um 2990, 375 ml um 3258 leh 180 ml um 7512 a ni a. Rum 750 ml um 1717, 375ml um 1271 leh 180 ml um 768 a tel bawk a. Vodka 750 ml um 105, 375 ml um 336, Beer canned leh bottle belhkhawm 5013 leh Paltu 600 ml hi bottle 20 a tel bawk a ni. Heng zu leihbuak zawng zawngte hlutna hi Rs. 92,29,890 ang a chhut a ni.
