No.3946/2021-2022 

Aizawl, the 9th February, 2022: Vawiin chawhma dar 11:00 khan District Disaster Management Authority, Khawzawl District chu an Chairman Pu C.C. Lalchhuangkima, District Bawrhsap ni bawk hovin DC Conference Hall-ah an thukhawm a, Covid-19 inkaihhruainate kengkawh tur leh, mipuiten Covid-19 Appropriate Behaviour (CAB) tha zawka an zawm theih nan Khawzawl Town chhungah sawrkar hnathawk Covid-19 Executive Duty din thar leh nise tiin an rel.

Meeting-ah hian DDMA Chairman Pu C.C. Lalchhuangkima chuan thu sawiin, Covid-19 vangin mi tamtak eizawnna leh zirna a buai phah a, inkhuahkhirhna khauh lutuk kalpui a nih chuan harsatna lian zawk a thlen thei a ni, a ti a. Chutihrualin Khawzawl District leh Mizoram pumah Covid-19 hrileng a pun zel avangin inthlahdul lutuk pawh a theih rih loh tih a sawi bawk.

Khawzawl khawpui chhunga police duty lohna, hmun hulum lai thenkhatah sawrkar hnathawk Executive Duty-te kar khat vel zel in duty chhawk thin se tiin DDMA chuan a rel a. Khawzawl District chhunga Village Level Task Force, sawrkar office leh kohhran te chu CAB Implementation Committee din vek tura ngen nise tih ani a. CAB chungchanga mipui inzirtirna uar zawka kalpui dan tur pawh ngaihtuah niin, social media leh tlangau kaltlanga inzirtirna thehdarh te, motor tlan lai atanga CAB chungchang inzirtirna puanchhuaha street campaign te neih thin nise tiin rel a ni bawk.

Meeting-ah hian Mizoram Sawrkar, Health & Family Welfare Department thuchhuah zulzuiin Covid-19 positive tam dan azira Zone hrang hrang Red, Orange leh Green zone a then dan tur pawh ngaihtuah nghal niin, District chhungah Red Zone a puan ngai khua a awm chuan DDMA in a ngaihtuah hnuah puan thin nise tiin rel a ni.

Khawzawl District-ah hian khua 28 a awm a, nimin tlai dar 5:00 thleng khan Covid-19 hrikai enkawl mek 280 awmin mi 3,338 chu an dam leh tawh a. Covid-19 vanga boral mi 5 (panga) an awm tawh bawk a ni.