2946/2024-2025

AIZAWL; the 13^th November, 2024: Vawiin chawhma dar 9:30 AM khan Home Department, Law & Judicial Department leh Judicial Academy, Assam te tangkawp chuan Executive Magistrate te tan Aijal Club-ah ni 2 awh tur Orientation Programme on 3 New Criminal Laws-{Bharatiya Nagarik Suraksha Sanhita (BNSS),  Bharatiya Nyaya Sanhita (BNS) leh Bharatiya Sakshya Adhiniyam (BSA)} a buatsaih a. Home Minister Pu K.Sapdanga chuan khuallian niin a hman pui.

Khuallian Pu Sapdanga chuan Training hawnna inkhawm tawiah thu sawiin, misual leh dan bawhchhia te hremna dan thar (Major Criminal Law) - Bharatiya Nyaya Sanhita (BNS), Bharatiya Nagarik Suraksha Sanhita (BNSS) leh Bharatiya Sakshya Adhiniyam (BSA) hi kumin July 1, 2024 atang khan India ram pumah hman tan a ni a. Tluang tak leh harsatna lian tham awm lova heng dan thar pathumte hi hman a nih theih nan Mizoram Sorkar chuan theihtawp a chhuah a. Police mi leh sate tan Criminal Law thar pual hian training  District hrang hrangah buatsaih tawh niin, vawiina ni 2 awh tur Executive Magistrate te tan orientation programme buatsaih leh theih a ni hi ka lawm hle a ni, a ti a. Trainee te chu an training hlawkpui ngei tura inbuatsaih tura chahin, duhsakna a hlan hlawm bawk a ni.

Training hawnna inkhawm tawi hi Pu Vanlalmawia, Secretary, Home Department in kaihruaiin, Pu Nasim Akhtar, Special Judge, ND&PS Faculty, Judicial Academy, Assam in key note address sawina hun a hmang a. Pu T.L.Guite, Secretary, Law & Judicial Department chuan lawmthu sawiin, Training hawnna inkhawm tawi chu a khar ta a ni.

Training hi Resource person pathum Pu Nasim Akhtar, Faculty, Judicial Academy, Assam, Pu Jaspal Singh, Principal Judge, Family Court, Barpeta leh Pi Shiva Handique, Research Officer, Judicial Academy, Assam ten an pe a ni.