Mizoram MP(LS) inthlan awm turah Lunglei, Saiha leh Lawngtlai District vil tura ECI-in a ruat Expenditure Observer Pu L.Hangsing, IRS chu March ni 15, 2014 (Inrinni) khan Lunglei a lo thleng a. Vawiin khan Lunglei Circuit House Conference Hall-ah Lunglei DC/DEO Pu Ashish Madhaorao More, IAS chuan election kaihhnawih officials zawng zawng kokhawmin Expenditure Observer hovin inthlan atan inpuahchah dan tur an sawiho a ni.

Lunglei DC/DEO Pu Ashish Madhaorao More chuan inthlan senso ziahfel (expenditure accounting) chu hna hautak leh fimkhur ngai, inthlan zawh tawh hnuah pawh uluk taka endik tul thil a nih avangin officials-te chu taima leh rinawm taka an thawh a pawimawh a ni tiin a fuih.

Expenditure Observer Pu L.Hangsing chuan nikum state election neih zawh takah officials-te chuan an hna an hmelhriat that tawh viau a rin thu a sawi a, March ni 27-ah Expenditure khawih tur officials zawng zawngte chu ama hovin training neih a rawt nghal a ni. Lunglei khawchhung bakah a vil tur district dang khua te pawh tlawh a duh tur thu Pu Hangsing chuan a sawi bawk.