No.2371/2021-2022

Mimkut thla ni 28, 2021: Lawngtlai town sanitation task force chu vawiin khan Lawngtlai DC Conference Hall-ah Lawngtlai Additional Deputy Commissioner Pi Marilyn Rualzakhumthangi hovin an thu khawm a. Faina Hapta (cleanliness week) 2021 hman dan tur leh faina kawnga hma lakna tur hrang hrang an sawi ho.

Meeting kaihruaitu Addl DC chuan sawrkar laipui ruahmannaa faina leh thianghlimna kawnga hma lakna kalpui chhoh mek chu Lawngtlai khawpui leh District pawhin theih tawpa zawm ve zel a tul thu a sawi a. India zalenna kum 75-na puala Azadi Ka Amrit Mahotsav hnuaia faina beihpui thlak mek leh faina hapta hman chhunga faina kawnga hma laknaah theih tawp chhuah turin kal khawmte chu chahin, faina chu inel nan mai ni lova nunphung leh tihdanphung pangngaia neih a pawimawh a ni, a ti.

Urban Development & Poverty Alleviation (UD&PA), Lawngtlai District-a District Programme Officer/SDO (Sadar) Pi TT Beikhaizi chuan Azadi Ka Amrit Mahotsav hnuaia faina beihpui thlak kalpui mek chungchang leh faina hapta hman dan tura state atanga kaihhruaina duan sa te a sawi fiah a. Member-te atangin rawtna hrang hrang ngaihthlak niin, hma lak dan tur te sawi ho zui a ni.

Kumin hian faina hapta hi October ni 2 atanga ni 8 inkar chhungin hman a ni dawn a. Thupuiah, "Faina - kan in leh a chhehvel atangin (cleanliness - from our home and its vicinity)" tih a ni ang.

Lawngtlaiah hian kumin faina hapta hawnna hun chu October ni 2, 2021 (Inrinni) zing dar 7:45-ah Lawngtlai Bazar Venga Areopagy hmunah hman ni se, tih a ni a. State lam atanga ruahmanna awm sa angin, faina hapta hman chhung hian faina kawnga intihsiakna leh inzirtirna hrang hrang kalpui tur a ni dawn a. Veng hrang hrangah village council-te kaihhruainain faina hnatlang leh inzirtirna kalpui a ni ang a, chhungkua, kohhran leh office hrang hrangte'n faina hnatlang an thawk bawk dawn a ni. Hemi pual hian faina kaihhnawih thlalak hmanga intihsiakna (thematic mass photography competition) leh 1-minute video clip insiamsiak te buatsaih tum a ni bawk a. October ni 8-a faina hapta kharnaah lawmmante hi sem tur niin, Azadi Ka Amrit Mahotsav hnuaiah veng fai ber leh sanitation worker thawk thate hnenah lawmman pek a ni bawk ang.

Vawiin thut khawmah hian UD&PA hnuaia thawktute, sawrkar official-te, Lawngtlai khawpui chhunga VC-te leh tlawmngai pawl ai awhte an tel a ni.