Pangngang chi khat Fall Armyworm (Spodoptera frugiperda) hi March, 2019 chawhnu lam khan Mizoram hmun thenkhatah hmuh a ni a. Heng rannung hian tun dinhmunah vaimim chinte a bei ber a, hun reilote chhungin Mizoram hmun hrang hrang atangin nasa takin vaimim chinte a bei tih report dawn a ni ta a. Hemi chungchanga mipuite inhrilhhriat nan leh he rannung puang beihlet nan Agriculture Department hmalakna leh hmachhawp tlangpuite chu hetiang hi a ni :-

April ni 13, 2019 ah he Fall Armyworm puan thu hi local channel kaltlangin mipuite hriat atan tarlan a ni a. District Agriculture Officer, KVK leh ATMA Staff ten an awmna District theuhah Vaimim chinna hmun fang chhuakin fall armyworm-in a tihchhiat dan assessment an nei a. Tun dinhmunah chuan vaimim chinna hmun a tihchhiat zau zawng report tawh hi hectare 1409 a zau a ni. Agriculture department chuan fall armyworm beihletna atana hmanraw tangkai chemical pesticides, sprayer leh a dangte a mamawh hnenah a pe chhuak mek.

He fall armyworm beihletna atan hian mumal zawka hma lak a nih theih nan Agriculture Department chuan State Level Fall Armyworm Rapid Response Team a din a. He team hian fall armyworm beihletna atana tul, thil hrang hrang te a ngaihtuah ang a, Research Institute hrang hrang te nen thawkho thei turin hma a la dawn a ni. Fall armyworm avanga harsatna neite chuan District Agriculture Office-ah report zel turin Agriculture Department chuan mipuite a hriattir.