Tukin zing dar 7 am khan UD&PA Minister Pu Zodintluanga bul tumin UD&PA officer te leh Aijal Club hotuten City Park siam that dan tur an en ho.
Pu Zodintluanga chuan, “Khawpui thang chho zelin a mamawh em em chu a chhunga chengte hawi khawthawnna leh chawlh hahdamna tur hi a ni a. Naupang infiamna leh len chhuahpuina hmun te pawh hi khawpuiin a mamawh em em an ni a, chutiang hmun chu siam theih inbeiseiin Aijal Club hotute nen hian hma kan la a ni,” a ti.
City Park hmun hi naupang hruai ngam lohna khawp hiala ruihhlo tih nan leh nawmchen nana hmang an awm thute hriat a ni thin a, chu chu UD&PA Minister hian ngai pawimawhin thianghlim zawk leh chhungkua pawha len ngamna hmuna siam chu Department thil tum a nih thu a sawi. City Park tihchangtlunna plan-ah hian solar panel hmanga power supply-na siam te, CCTV dah te, man chawia hman theih tur amphitheatre te, City park atanga Aijal Club awlsam taka kal theihna tur ruahman te, tuna restaurant awmnaah hian multi level car parking tih theihna tur siam te, naupang awmtleina hmanrua engemaw zat dah te ruahmannaah hian a tel bawk a ni. Minister hova UD&PA officer leh Aijal Club hotute kal khawm chuan mipui punkhawm leh len nan Mizoram hmun hrang hrangah park mumal tak mamawhna a sang hle tih sawiin Aizawl City Park chei leh tihchangtlun bakah hian Mizoram hmun hrang hranga park awm sa leh park-a siam theih te chu siam a nih theih nan kum 20 chhunga tihhlawhtlin tur plan mumal tak siam ni se, UD&PA Department-in hma lo la chhunzawm se an ti bawk a ni.
City Park tlawh zawhah hian UD&PA Minister Pu Zodintluanga chuan State Convention Centre sakna tur Circuit House hmun chu a tlawh nghal a, hnathawk kal mek te a en nghal a ni. Minister chuan fur ruahtui a tlak hmain lei laih theih ang angte chu laih zawh a nih theih nan contractor pawhin tan la se, department engineer te pawhin tluang taka hna a kal theih nan thahnemngai takin lo en zui se, tiin a sawi a ni.
City Park leh State Convention Centre sakna hmun ennaah hian Minister hi Dr C. Vanlalramsanga, Secretary, UD&PA; Pu Vanlalmawia, Joint Secretary, UD&PA; Pu Zorammuana, Director, UD&PA leh UD&PA officer engemawzatin an tawiawm a ni.
