1674/2022-2023
Khawzawl the 22nd August, 2022: Khawzawl District chhunga Sawkar flagship programme Socio Economic Development Policy (SEDP) hnuaia kalpui tur, Family Oriented SEDP khuhhawnna neih dan tur chungchang relin Khawzawl District Level SEDP Committee chu vawiin chawhma dar 10 khan DC Conference Hall-ah an Chairman Bawrhsap Pu C.C. Lalchhuangkima hovin an thukhawm.

Bawrhsap Pu C.C. Lalchhuangkima chuan Khawzawl District-a SEDP kalpui mai tur chu chhungkaw tinzawna duan Family Oriented a nih angin chhungkaw tam tak tan hmasawnna a thlen ngei a beisei thu a sawi a. Family Oriented SEDP chu August ni 19, 2022 ah Mizoram pum tana hawnna inkhawm Chief Minister hovin Aizawlah neih tawh a nih thu sawiin, Khawzawl District-ah pawh August ni 24, 2022 hian District Level SEDP Committee ruahmannain a hawnna hun buatsaih tum a ni, a ti a. Sawkar flagship programme pawimawh tak Khawzawl District-a kalpui a ni tur chu lawmawm a tih thu sawiin, SEDP buaipui nana senso ngai adminstration cost pawh District Level SEDP Committee kuta hlan a nih tawh thu a tarlang bawk.

He huna tarlan a nih dan chuan Khawzawl District-a Family Oriented SEDP hawnna hun hi khuallian, I&PR Minister Pu Lalruatkima hovin August ni 24, 2022 (Nilaini) chawhma dar 11 hian Zaingen Branch YMA Hall-ah neih a ni dawn a. He hun hi Pu L.Thangmawia, MLA, Vice-Chairman, Human Resource Development Board chuan khualzahawm niin a telpui dawn bawk a ni. Vawiina District Level SEDP Committee thukhawm hian Family Oriented SEDP hawnna huna program hman dan turte a duang a, a hawnna hunah hian Village Level SEDP Committee hnenah cheque sem chhuah nise tih a ni bawk.