Vawiin chawhma dar 11:00 khan Saikuti Hall Lunglei ah AMFU Lunglei District buatsaih in Farmer’s Meet cum NLUP awareness Campaign neih a ni a, Pu J.H Thanzuala, Vice President, AMFU Lunglei District in a kaihruai a ni.

He Farmer’s Meet cum NLUP awareness campaign hi Mizoram Chief Minister zahawm tak Pu Lal Thanhawla‘n a hmanpui a. Chief Minister hi a thiannu Pi Lal Riliani‘n a tawiawm bawk. Thu sawiin Chief Minister chuan rorelna dik, tha leh fel Mizoram ah a awm theih nan Pathian in tun Sawrkar hi min pe a ni, ati. He Sawrkar hian hmeithai, pachhia leh mi rethei a ngai pawimawh dawn a, Mizoram a mi rethei leh hausa kar zau lutuk tawh hnawhkhat a tum a ni, ati. Kan ram tluchhe mek tung ding leh tur leh retheihna lak ata khai chhuak leh tur in NLUP programme a duang chhuak leh a, kohhran, NGO leh mithiam te nen thawk hovin tih hlawhtlin a tum dawn a ni, ati. Kum nga chhung NLUP kalpui turin cheng Vaibelchhe sanghnih za nga Central in min ruahman sak a, kumin Financial Year March 2010 thleng a hman turin cheng vaibelchhe za ruahman phawt a ni, ati. He programme leh scheme buaipui tu tur state level district Level leh Village Level thlengin sawrkar chuan a duang mek a ni, ati. Mizoram ringtu 100% awmna ah hian theihtawp tan kan lak a, rinawmna, taimakna leh dikna nen kan thawh chuan a hlawhtlin ngei ka beisei a ni, ati.

Pi M.Zohmingthangi, IAS, Lunglei Bawrhsap pawh in thu sawiin rethei leh kut hnathawk te tana chanchin lawmawm NLUP hi Chief Minister leh a thawhpui ten an rawn thlenah hian Lunglei District hi a ti hlawhtlingtu leh Model District ni turin mitin te tan la tur in a ngen.

Pu Selthuama, MLA , Vice-Chairman NLUP Apex Board pawhin thu sawiin he NLUP pawisa sawrkar in a sem tur atan khawi department sum mah lak sak a ni lova, plan sum atanga awm sa vek a ni, ati. He NLUP hi Zofate tan Mana ang a ni a, kan dam khawchhuah nana sawrkar ruahman a ni, hemi kan din chhuahpui lo anih erawh chuan thildang beisei tur a vang hle tawh ang ati. Tun tum NLUP hi a hma a mi ai khan changtlung zawk in sawrkar in a duang a ni, ati.

He awareness campaign hi Minister, Vice Chairman HPC, MLA ten hmanpui in Farmer’s tamtak ten an chhim a ni.