3458/2022-2023
Kolasib dated 2nd February 2023: Vawiin chawhma khan Pu K.Lalrinliana, Minister, Food, Civil Supplies & Consumer Affairs Department, Kolasib Assembly Constituency bialtu MLA ni bawk chuan Bairabi North-ah MLA-LADS hmang a Football khelmual laihna tur lungphum a phum a. Pu R.Lalfakawma, Chairman, Joint Village Council, Bairabi chuan hun kaihruaiin Pu R.Lalrinawma, President, Village Council, Bairabi South chuan kalkhawmte lawmna thu a sawi bawk a ni.

Minister Pu K.Lalrinliana chuan Bairabi khua chu ramri hnaih a awm a nih angin sawrkarin kawng hrang hranga tihhmasawnna hna kalpui a ngaih pawimawh thu a sawi a, heng hmasawnna hna thawh tawh leh thawh zel tur te hi khawtlang tan a ro tling ni tur a vilpui leh enkawl hna chu neitu nihna thinlung puchunga kalpui thin turin a chah. Oil Depot changtlung tak bun a nih theih nan Bairabiah hun engemaw chen chu ruahmanna kalpui a nih thu Minister chuan sawiin IOCL lamin hmunhma rem leh zau zawk hmun dangah an hmuh tak avangin Bairabia IOCL hmun chu inbiakrem hnu ah khawtlang tan a hmun tangkai a hman a nih theih nan MLA-LADS sum hmangin khelmual siamna tur a ruahman a nih tak thu a sawi a. Bairabi khaw mipuite leh a chhehvel khua mipuite tan infiamna leh hriselna kawng a hmasawnna thlen tur a hmun tangkai tak a nih theih nan changtlung zawk a siam chhoh zel tum a nih thu Minister chuan a sawi bawk a ni.

Minister Pu K.Lalrinliana chuan Tlawng lui lian avanga Bairabi khawtlangin harsatna an tawh thin tihziaawm nan ‘Construction of River Training Works For Protection of Tlawng River At Bairabi Phase-1’ hna kalpui mek chu a hmun ah a tlawh a. Thawktute kawmin fur ruah thlen hma a hna chak tak a thawh a nih theih nan tan la zel turin a chah a, hunbi tuk chhunga hna zo hman turin a hrilh bawk a ni.

Pu Lalrinngheta, EE, PWD tarlan danin he Project hian Bairabi khaw chhung, Tlawng kam, tui lianin Mizoram lam a tih chhiat zel tur venna tur siam a ni a. A siam dan tur tlangpui chu Tlawng kam ah mumal tak a lung (boulder) rem tur a ni ang. Kum 2019 atang khan Local Administrative Department (LAD) hnuai ah Blue Hill Engineering-in tui len dan leh a thil tih chhiat dan te zir chianna a lo nei tawh a. Chumi zulzui chuan vau kam ven dan tur ruahmanna pawh siam niin tui lianin vau kam a tih chhiat tur ven ngai hi km 1.50 vel anga chhut a ni. A thawhkhatna atan hian NABARD kaltlangin Phase-1 ah hian 300 meter velah hmalakna kalpui mek a ni.

PWD EE Pu Lalrinngheta chuan NH 154 Pangbalkawn leh Zero Point inkar kawng siamthat hna thawh mek a nih thu tarlangin Bairabi leh Pangbalkawn inkar kawng thawmthat hna erawh Tender chhuah mek a nih avangin hna kalpui tan a la nih loh thu a sawi a, chak tak a hma lak mek a nih thu leh fur hma a hna thawh hman beisei a nih thu a sawi.