Vawiin khan Minister, FCS&CA Minister Pu H.Rohluna chuan  Luangmual, Zonuam, Chawlhhmun, Govt. Complex, Sakawrtuichhun leh Tanhhril huam  tur Gas Agency thar, M/S Zothan Indane Agency, Luangmual-a mi chu a hawng. Hawnna inkhawmah hian FCS&CA Secretary Pu K.Riachho, IAS chu Khual Zahawm a ni a,  FCS&CA Director Pu.H.Lallungmuana, IAS chu Special Invitee a ni bawk.

 

 

Khuallian Pu H.Rohluna chuan LPG chu mipuite nitin mamawh a nih avangin Sawrkar leh company pawhin tan an la nasa a, vawiina Luangmual leh a chhehvel Gas mamawh phuhruk thei tura Zothan Indane Agency hawn a ni chu lawmawm a tih thu a sawi a, tun atanga reiloteah Seling leh Kulikawnah pawh hawn thuai beisei a ni a ti. Union Minister of State for Petroleum & Natural Gases hnenah Mizoram mamawh a thlen tawh thu sawiin Minister chuan Rajiv Gandhi LPG Vitrak Scheme hnuaia Gas Agency thar 18 hawng tura ruahmanna siam chhoh mek a nih thu a sawi. Minister chuan Mizoram chawmtu ber Mualkhang leh Borkhola Bottling Plant-te chu June thla hma ngeia tihchangtlun leh khawl thazawka thuamthat a nih tur thu  sawiin, Gas indaihlohna pawhin ziaawm lam a pan ngei a beisei thu a sawi. Sawrkar chuan mipuiten hnianghnar zawka gas an neihna turin Agency thar engemawzat hawn theih nan Indian Oil Corporation hotute a sawipui tawh thin thu leh District Headquarters tan LPG tam zawk pek a nih theihnan hma lak mek a ni a ti. Gas harsatna a lo ziaawm theihnan mipuite pawh dan lova Gas hralh thin te dawr lo tura fimkhur turin a chah. Vawiina hawn tak Zothan Indane Agency chu mipuite rawngbawlna kawngah hawihhawm leh dik taka hnathawk turin duhsakna a hlan a ni.

Khualzahawm FCS&CA Secretary Pu K.Riachho, IAS chuan sawrkar ngenna ngaipawimawha IOC-in Mizoram mipuite mamawh phuhruk tura hmathar an rawn la zel chu lawmawm a tih thu a sawi a. Ramngaw a lo chereu tak avangin thing leh mau pawh nasa zawk a humhalh a tul thu leh LPG gas pawh uar zawka kan hman a ngaih thu a sawi a. Sawrkar ruahmanna tharah chuan a bikin BPL chhungkuate tan Gas connection man tlawm zawka pek tum a nih thu leh senso pawh a chanve IOC-in a tum sak turin Sawrkar Laipuiin ruahmanna a siam mek a ni a ti.

IOC Area Manager Pu Kamlesh Debnath pawhin thusawiin kum 2004-2007 marketing plan-a telh daih tawh Luangmual area tan vawiinah Zothan Indane Agency hawn a ni thei ta chu IOC lam pawh an lawm hle a ni a ti. Tunah hian Mizoram tan LPG Cylinder nuai khat leh singkhat an pek theih chin a ni a, sawrkar hmalaknain sumdawngte hman tur bik Commercial Cylinder 500 chuang pektan tawh a ni a, hei hian Gas indaihlohna chu thui takin a ti ziaawm a ni a ti. Sawrkar Laipui chuan ‘Vision 2050’ hnuaiah ramchhung mipui za zela 75% ten Gas connection an neih theihna turin ruahmanna a siam mek thu a tarlang bawk.

Khuallian chuan Appoinment Letter leh Agreement to Proprietorship chu M/S Zothan Indane Agency hnenah a hlan nghal a. He  Agency hnuaia Connection hmasaber chu Khuallian Pu.H.Rohluna hnenah pek a ni. Zothan Indane Gas Agency hian Sakawrtuichhunah Godown Cylinder 8000 dah theihna a nei a ni.