52/2023-2024

Kolasib dated 6th April 2023: Vawiin khan Diakkawn YMA Hall, Kolasibah Kolasib Auto Rickshaw Drivers’ Union chuan an pawl din atanga kum 25 an an tlin lawmna, Silver Jubilee pualin hun an hmang a. Pu K.Lalrinliana, Minister, Food, Civil Supplies & Consumer Affairs, Kolasib Assembly Constituency bialtu MLA chu Khuallian niin Pu John LT Sanga, Deputy Commissioner chu khual zahawm a ni a. Pu Ramfangzauva Ralte, President, KARDU in hun kaihruaiin Pu Lallianmawia, Gen. Secretary chuan hruaitu inhmelhriat tirna hun a hmang bawk a ni.

Minister Pu K.Lalrinliana chuan lirthei khalh a eizawng pawl hrang hrang zinga Kolasib district chhunga mipui chetzelna atan a pawimawh tak Kolasib District Auto-Rickshaw Drivers’ Union din atanga kum 25-na hmang thei a an awm chu a lawmpui thu sawiin an nitin eizawnna chu mipui thleng pha a nih angin midang tan a malsawnna thlentu ni zel turin a chah. Pu K.Lalrinliana chuan hlawhtlinna hmu tur chuan eng hna pawh thawk ila, rinawmna nen a kalpui a pawimawh thu sawiin lirthei khalhtute rinawmna avangin ram leh hnam anga fak leh chawimawina a awm fo thu a sawi.

Mahni zawn theuh a kan phak taw kanga eizawnna dap chu intodelhna kawng a thil pawimawh tak a nih thu leh intodelhna tluantling awm tur chuan thialthil chhawrtlak zir chhuah leh kut hnathawh chawisan a tul thu Minister chuan a sawi bawk a ni. KARDU Silver Jubilee lawmna ah hian Pu K.Lalrinliana chuan lirthei hmanga eizawngtute chuan lirthei leh a kaihhnawih a dan zawm tur awmte zirchiang turin leh midangte tan heng dan pawimawhna hrilhhretu nih tum turin KARDU member kalkhawmte chu a chah bawk a ni.

Khual zahawm Pu John LT Sanga, Deputy Commissioner chuan Auto-rickshaw chu India khawpui tam zawk a mipui vah vel nana an hman tam ber lirthei a nih thu sawiin Kolasib district-ah ngei pawh tangkai tak a mipui tan he eizawnna hi kalpui a nih thu a sawi a. Kolasib chu State luhkapui a nih angin Auto-rickshaw khalhtute chu hawihhawm tak leh rinawm taka an lirtheite khalh turin leh nunna hlu tak an kut ah a awm a ni tih hria an lirthei tha taka an khalh theih nan an hriselna ngai pawimawh turin a chah bawk a ni.

KARDU Silver Jubilee hmanna ah hian member boral sunna hun hman niin hruaitu hmasa chawimawina hunte neih a ni a, All Mizoram Auto Rickshaw Owner Association aiawh atanga thusawi ngaihthlak niin Pu Jerry Zothanpuia, Vice President, KARDU in lawmthu sawina hun a hmang a, Silver Jubilee pual hian Bangla Kawn Auto Rickshaw Stand-ah lungphum phumna hun neih a ni bawk. KARDU ah hian member 289 awm mekin Kolasib district chhungah hian Auto Rickshaw Stand 15 a awm bawk a ni.