No.2815/2021-2022

Aizawl 1st November 2021:  Department hmunhma hrang hrangte enfiaha khawchhak tlang dung tlawh mektu Pi Ramdinliani, Director, Food Civil Supplies & Consumer Affairs (FCS&CA) Department chuan Inrinni khan Pu C.C. Lalchhuangkima, Deputy Commissioner, Khawzawl District nen Legal Metrology Office hmun tur a District Land Committee in a lo ruahman tawh Far mual, DC Rest House hnuaia mi chu a hmunah kalin an enfiah a, a hmun zau zawng an teh chhuak nghal a ni.

Legal Metrology Office hmun tur enfiahnaah hian Khawzawl Joint Village Council hruaitute, Asst Controller, Legal Metrology, Junior Engineer leh FCS& CA Department official dangte an tel a ni.

FCS&CA Director leh Khawzawl District Bawrhsap-te chuan Khawzawl Kawnzara Supply Godown chu a hmunah kala enfiah nghalin, tun dinhmunah chuan Buhfai stock a awm tha tawk a ni. Supply Godown hi Buhfai Truck phurte awlsam zawk a an in unload theihna turin Godown hela Buhfai Truck phur kal theih dan tur ngaihtuah nghal a ni a. Truck kalna tur kawng siamna tur hi sum a ngaih hnem dawn avangin uluk zawk a ngaihtuahna sen a ngai dawn a, hotu sang zawkte nena la ngaihtuah that leh atan tih a ni.

Hemi hnu hian Khawzawl Hermon venga FCS&CA Department ram tlawh leh niin, a hmunhma a that avangin Legal Metrology Office chu Khawzawl Hermon vengah hian sak mai nise tih a ni a. DCSO Office leh Quarters pawh he ramah vek hian dah theih nise tih a ni a, Department ram chhunga khawtlang tangrualin School an sak chungchang pawh uluk zawk a la sawiho nise tih a ni bawk. Khawzawl Hermon venga Department ram tlawhnaah hian Official-te hi Khawzawl Hermon VC ten an tawiawm a ni.

Hemi hnu hian Supply Director hian nimin vek khan Champhai District tlawh lehin, Champhai District Bawrhsap Pi Maria C.T Zuali, DCSO Pu Spencer Vanlalchhuanga leh Official dangte nen Kelkang, Khuangleng, Dungtlang, Bungzung leh Khawbung Supply Godown-te an tlawh a. Khawtlang hruaitute nen Godown dinhmunte enfiahin hmalak ngaihnate an sawiho nghal bawk a ni.