No.3493/2020-2020 

Vawiin khan Pu K Lalrinliana, Minister of State for Food, Civil Supplies and Consumer Affairs Department chuan NABARD leh MGNREGS Convergence hnuaia sak, Bairabi South a chawhmeh zawrhna hmun tur, 'Rural Haat' hawngin Bairabi North a Local Administration Department hmalakna a sak, Panchayat Bhavan a hawng nghal bawk a. Bairabi North Multipurpose Mini Sport Complex sakna tur lungphum a phum nghal bawk a ni. Minister hian Bairabi a zirlai, tun hnai a HSLC/HSSLC exam result chhuak a hlawhtling te chawimawina hun, YMA Bairabi North Branch te buatsaih a telpui bawk a ni.

Rural Haat hawnnaah hian Pu K Lalrinliana chuan, lo, huan leh dil atanga kan thil tharchhuah hrang hrangte hi a mamawhtute hnen a thlen zung zung theih nan zawrhchhuahna leh dahkhawmna tur hmun laili neih a pawimawh thu sawiin, chutiang a hman tur, Bairabi South a Rural Haat sak hlawhtlin a nih theih nana Nabard, BDO Bilkhawthlir leh VC te hmalakna chu fakawm a tih thu a sawi a. Nabard kaltlangin Mizoramah hmasawnna hrang hrang kalpui tum mek a nih thu a sawiin, Warehouse 21 sakna tur a hmalak mek a nih thu leh Fisheries department nen pawh thawhhona tha tak hnuai a ruahmanna siam mek a nih thu a tarlang bawk a ni. Pu K Lalrinliana chuan khawvel hmun hrang hrang a buaina thlentu Covid-19 hripui avangin Mizoramah pawh hmalakna hrang hrang duh anga kalpui theih loh changte a awm thin a, a hri vei endik leh enkawlna kawngah theihtawp chhuah a nih rualin a enkawl a hautak hle a. Hemi a nih avang hian Sawrkarin inkaihhruaina zawm tur a duan, mask vuah, kut sil leh inkarhlat a awm te zawm hram hram hi khua leh tui tha nihna a ni tih hria in, zawm theuh i tum ang u, a ti.

Panchayat Bhavan, Bairabi North hawnna hun hmanpuiin Minister K Lalrinliana chuan mipui rorelna tha leh hlawhtling, inrelbawlna felfai leh khawtlang tan a hmasawnna inkhairual tak thlentu ni turin Panchayat Bhavan, North Bairabi chu duhsakna a hlan a. Sawrkarin mipui inrelbawlna tha a ngaih pawimawh thu leh hemi kawnga hmasawnna a awm theih nan ruahmanna tam tak siam a nih thu te, Village Council-te tih hmasawn nan State Finance Commission leh Excluded Area Fund hnuaiah hmalak dan tur ruangam tha tak tak kalpui tum a nih thu te a sawi bawk a ni. Minister hian Multipurpose mini sport complex lungphum a phumnaah hian Bairabi North Volleyball Association te hnenah Volleyball leh net a hlan bawk a ni.

YMA hall, Bairabi North a zirlai hlawhtlingte chawimawina hun a hmanpuinaah Pu K Lalrinliana chuan, kan nitin khawsakna kawngah leh ei leh bar zawnna kawnga tangkai tur thiamna zir chhuah ngei tum ula, a bik takin kan ram intodelh theihna tur a thiamna leh theihna tangkai zirchhuak turin tan la sauh sauh rawh u, a ti a, kan ram hausakna tam tak ram pawn a luangchhuak thin te hi kan ram chhung ngei a tangkai tak a hman a nih thuai theih nan taimakna leh thiamna nen a hma latu ni thei turin zirlai te chu a fuih bawk a ni. Intodelh hi ramri humhalhna hmanraw pawimawh ber a ni a, intodelh tur chuan thiamna chhawrtlak leh tangkai neih a pawimawh hle a, intodelhna ziktluak nei tur chuan tun a zirlai pass thar te kutah hian a innghat thui hle a ni, a ti bawk.

He hunah hian HSLC pass thar mi 16 leh HSSLC pass thar mi 19 te hnenah lawmpuina thilpek hlan an ni.

He hunah hian Pu Zoensanga, Director, LAD, Pu S.N. Mallick, General Manager, NABARD, Mizoram, Pu Neng Thianlala, BDO, Bilkhawthlir leh Officer dangte bakah Bairabi North leh South Village Council leh NGO hrang hrang hruaitute an tel bawk a ni.

Rural Haat, Bairabi South sakna tur hian NABARD atangin Rs.10 Lakhs, MGNREGS convergence atangin Rs. 1.343 Lakhs leh Village Council, Bairabi South atangin Rs. 59700 seng a sak a ni a. Bairabi North Panchayat Bhavan hi Rs 20 Lakhs seng a sak a ni bawk a ni.