No.3317/2021-2022

Aizawl dated 8th December 2021: Vawiin chawhnu khan Art & Culture Department leh Mizoram Cultural Organization, Sub Headquarter, Kolasib tangkawp buatsaih Pawl Kut 2021 lawmna hun chu I&PR Conference Hall, Project Veng, Kolasibah hman a ni a. Pu K.Lalrinliana, Minister of State for Food, Civil Supplies & Consumer Affairs Department, Kolasib bialtu MLA ni bawk chu Kut Pa niin Pu C.Lalrinkima, President, MCO chu Kut Thlengtu a ni bawk a ni.

Kut Pa Pu K.Lalrinliana chuan hnam dinchhuahna leh tih hmasawnna kawngah hnam ziarang leh nun ze mawi kan neih ang angte chu chawi nun reng a pawimawh thu a sawi a, ram chhung leh pawn a kan unau zohnahtlakte nen pawh a inunauna tha leh induhsakna lantirna hun atan Mizo ina Kut kan neihte chu hman a pawimawh thu a sawi bawk a ni. Kut hmanna a hnam thuam leh hnam lamte phochhuah a nih hian hnam anga kan ziarang leh kan nun zia humhimna hmanraw tangkai tak a nih thu sawiin Pawl Kut hlawhtling tak a hman a nih theih nana MCO, Sub Headquarters, Kolasibte hmalakna fakawm a tih thu a sawi a. Mizoram chu hmun hrang hranga zofate tan inpui a nih angin a chhunga chengte pawhin rilru zau leh inhawng tak a unaute dawngsawng thintu ni turin kalkhawmte a chah bawk a ni.

Kut Thlengtu Pu C.Lalrinkima, President, MCO, Sub Headquarters, Kolasib chuan Pawl Kut 2021 hmang tur a inbuatsaihna kalpui a nih dan hrang hrang tarlanna hun a hmang a, Kolasib district chhunga Cultural Club 16-te an inlan thu a sawi.

Kolasiba Pawl Kut 2021 lawmna hawnna hun hi Pu R.Lalawmpuia, Chairman, Organizing Committee-in a kaihruai a, hnam lam, zai leh rimawi tumte ngaihthlak niin Virtual Program-a hman chhunzawm a ni a. Hnam zai, lam chi hrang hrang leh pawnto-te entir niin zanin dar 7:30 PM hian CZS leh KCN Cable Network-ah tihchhuah a ni dawn a ni. Youtube lam a thlir duh tan a hnuai a linkah hian entheih a ni dawn bawk a ni.

CZS Youtube Channel : www.youtube.com/channel/UCufQhhjpZlS1ktcqgHxZeiw

KCN Youtube Channel : www.youtube.com/channel/UCtKeWkHAunzr5ff_LzJYs7Q

MLA-LADS hmang a sak, Tuithaveng Community Hall, Kolasib chu vawiin khan bialtu MLA Pu K.Lalrinliana chuan tangkai tak a hman a nih theih nan a hawng nghal bawk a ni.