Vawiin khan Fifteenth Finance Commission Chairman Pu Pu N. K. Singh leh Member te - Pu A.N. Jha leh Dr. Ashok Lahiri leh Member Secretary Pu Arvind Mehta te chu zan khat riak turin an thuihhruai Fifteenth Finance Commission Officer te nen Mizoram an lo thleng.

Fifteenth Finance Commission hian chawhnu dar 3 khan Mizoram New Capital Complex Conference Hall-ah Mizoram Sawrkar hotulu te - Chief Secretary Pu Lalnunmawia Chuaungo leh Commissioner leh Secretary te nen meeting chhawng thum an nei a. Meeting chhawng khatnaah Mizoram sum mamawh te thlenin an mamawh chhan te an sawifiah ni a ni. Meeting chhawng hnihnaah hian khawpui inrelbawlna leh enkawlna (Urban Local bodies) dinhmun tarlan niin Project proposal thar atana sum mamawh te thlen a ni a. Meeting chhawng thumnaah hian Village Council te tih changtlun zelna atana sum mamawh te thlen niin hengte hi sawifiah a ni.

Meeting ah hian Chief Secretary Pu Lalnunmawia Chuaungo chuan Commission Member te chu Mizoram an lo tlawh avangin an hnenah lawmthu hrilhin, kum sawmhnih chhung Mizoram a buai avangin state dangte tehkhinin hmasawnna lamah Mizoram chu a hnufual bik a, hmasawnna ruhrel lamah te, inkalpawhna lamah te leh thil dehchhuah lamah te, kan mamawh angin hma kan sawn chak thei lova rilru zau tak pu chungin kan thu thlen hi min ngaihtuahsak turin ka ngen che u a ni, a ti.

Meeting ah hian Secretary (Finance Commission) Pu Lalmalsawma'n Mizoram sum leh pai dinhmun leh sum mamawh dan te tarlanna (presentation) a nei a. A presentation ah hian Mizoram economy dinhmun te, Sawrkar sum hnar leh sum hmanna hrang hrang te, State leiba leh leiba rulh dan te, Revenue leh Capital Expenditure inthlauh dan te chu chipchiar takin a tarlang a. Mizoram sum leh pai dinhmun leh sum hman dan chungchanga Commission Chairman leh Member te zawhna chu Mizoram Sawrkar hotute te hian an chhang a ni. Finance Commission hmasa te sum pek (Grant) chu leiba tih hniam nan te leh hmasawnna hna thawh nan Sawrkarin a hman tangkai thu Chief Secretary hian a sawi bawk a ni.  Kum 2020-2025 chhunga Sawrkar sum mamawh, a hmanna tur leh sum hnar awm thei thlirlawkna projection pawh Finance Commission hnenah thlen niin leiba tihhniam kawnga Mizoram Fiscal Responsibility & Budget Management Act, 2006 in a phut angin an tih mek zel thu te pawh meeting ah hian tarlan a ni.

Mizoram chu khuarel chhiatna a bik takin lei min leh lei tlahniam te a tawh hnem avangin State Disaster Relief Fund leh State Disaster Mitigation Fund atan sum phal taka pe turin ngen a ni bawk.

Meeting chhawng hnihnaah hian UD&PA Secretary Dr. C. Vanlalramsanga’n Urban Local Bodies dinhmun leh sum mamawh chungchang leh meeting chhawng thumnaah LAD Secretary Pi Zoramthangi Hauhnar in Rural Local Bodies dinhmun  leh sum mamawh chungchangah presentation an nei a ni.

Mizoram Sawrkar in Fifteenth Finance Commission ah hian cheng vaibelchhe 94,647.33 a dil a. Chungte chu Pre Devolution Revenue Deficit Status atan cheng vaibelchhe 57,737.38; Capital Expenditure mamawh phuhruk nan cheng vaibelchhe 17,357.90; State Asset-te enkawlna atan cheng vaibelchhe 5779.00; 7th Central Pay Commission Mizorama kalpuina atan  vaibelchhe 1283.70; State Disaster Relief Fund leh State Disaster Mitigation Fund atan cheng vaibelchhe 1000.00; Local Bodies( Village Council, Urban Local Bodies, Autonomous District Council-te leh Sinlung Hills Council) atan cheng vaibelchhe 2292.39; Forest Maintainance atan cheng vaibelchhe 1450.00 leh State Specific Needs atan cheng vaibelchhe 7746.96  te a ni.

Meeting zawh dawnah, kharna thu sawiin Fifteenth Finance Commission Chairman Pu N.K.Singh chuan inkalpawhna, tourism, social infrastructure leh khawpui nun urbanization te chu a bika ngaihpawimawh a tul thu te sawiin Mizoram Sawrkar in sum mamawh a dil leh a thlen te chu Commission in rilru zau tak pu chungin ngaihtuahin rawtna a siam dawn a ni, a ti.

Finance Commission hi kum 5 dan zela Ram Danpui in a phut angin din a ni thin a, an hnathawh ber chhiah hrang hrang atanga sum tlingkhawm State-te pekchhuah dan leh a zat rawt te, State-te sum mamawh dan lo enfel te a ni a. Fifteenth Finance Commission hi November 2017 khan din niin Sawrkar kum 2020 atanga sawrkar kum 2025 thlenga State te sum mamawh leh hemi chungchanga rawtna siam a ni. Commission hian kum kum tawp lamah an rawtna te hi Central Sawrkar ah thehluh hman an beisei a ni. 

Mizoram tiamin Fifteenth Finance Commission hian tun thlengin state 20 an tlawh tawh a, Naktuk zingah Delhi ah an haw thla dawn a ni.