Vawiin hian Serchhip DC chamber ah District Election Officer Dr. Lalzirmawia Chhangte, IAS chuan chuan Special Summary Revision of Electoral Roll, 2020 Final Publication chu a tlangzarh a, political party te hnenah a copy a hlan nghal bawk.

District Election Officer chuan, ERO, AERO, leh BLO te, khaw hrang hrang tlawmngaipawl te, Electoral Roll fel fai tak a awm theih nana thawktu zawng zawng te chungah lawmthu sawiin, Roll dik leh fel fai a awm theih nan fimkhur taka hnathawh a tul thu a sawi a. District Election Office lam pawhin Roll dik leh fel fai kan neih theih nan theih tawp an chhuah thu a sawiin tihsual palh erawh a la awm thei tho bawk a, a tul ang zela inhrilhhriat a that thu kal khawmte a chah a ni.

Final Roll dinhmun tlangpui Pu Vanlalhmachhuana, Election Officer chuan a tarlanga; Special Revision chhung hian district chhungah from 6 hmanga dilna dilna chi hrang hrang 1,424 a luta chung zinga 1,347 te dilna chu tlingah ngaiin ngaihtuah sak an ni a, Form 7 hmanga dilna 546 lutin an zinga 519 chu dilna tlingah ngaia ngaihtuah sak an ni bawk a, Section 22 hmanga paih hi tumah an awm lo bawk. Roll atanga delete (paih) hi an vaiin 537 an awm a, paih te chu boral 335, pem 157 leh awm nawn (chuang nawn) 38 te bakah midang (a chhan ziah ve theih chiah loh) 7 te nen an ni. Tichuan Final Roll, 2020 ah hian 26 Serchhip ah voters 18, 583 (mipa 8798 leh hmeichhia 9785) te an awm a, 27 Tuikum ah voters 16065 (mipa 7982 leh hmeichhia 8082) an awm a, 28 Hrangturzo ah voters 15956 (mipa 7940 leh hmeichhia 8016) awmin an vaia belh khawmin voters 50604 an awm a. Serchhip district chhung bial pathumah te hian mipa aiin hmeichhe voters an tam zawk vek a ni. Tin, Service voters hi 26-Serchhip ah 185, 27-Tuikum ah 118 leh 28- Hrangturzo ah 93 an awm bawk a, chungte nen chuan District total chu 51,000 niin an zinga 25,115 hi mipa an ni a, 25,885 te chu hmeichhia an ni.

Final Roll copy hi political party aiawh lokal te hnenah Dr. Lalzirmawia Chhangte hian a hlan nghal a, he hunah hian Party aiawh te, NGOs te, chanchinbumite, ERO leh AERO te an tel a ni.