No.1941/2020-2021

Finance Department chuan May 22, 2020-a cabinet thuthlukna bawhzuiin sorkar hnathawkte hlawh hrensakna tur OM chu ni 11/6/2020 hian a ti chhuak ta a, hengte hi mipui hriattura sawifiah ngai nia hriain hetiang hian Finance Department chuan sawifiahna a tichhuak:

1. Hlawh hrensak zat tur hi Gross Salary atanga chhut tur a ni a. Hei hi Committee on Economy Measures in kil hrang hranga a ngaihtuah hnu leh Council of Ministers thukhawmin a pawm tak dan ang a ni. He hlawh hrensak atang hian thla tin Rs. 30 crore vel hum theih beisei a ni a. Thla thum chhung hian Rs. 90 crore hum theih beisei a ni. A zat dik tak erawh chu Treasury tin te report atangin a la hriat theih chauh ang.

2. Hlawh hrensak hian Mizoram sorkar hnuaia sorkar hnathawk zawng zawng te a huam vek ang. Grants-in-Aid hnuaia hlawh la leh Contract basis-a hnathawkte pawh an hlawh Mizoram sorkar tum sak ve an awm a nih chuan he hlawh hrensak hian a huam vek ang.

3. Hlawh hrensak hian Gross Salary a Rs. 40,000 leh a hnuailam la te chu a huam dawn lo a. Rs. 40,000 aia tam hret lo la te pawh hlawh hrensak avangin Rs. 40,000 aia tlem an lak loh na turin ruahman a ni. Chuvangin, Group D tam ber te hi chu hlawh hrensak hian a huam dawn lo a, Group C engemaw zat te pawh a huam dawn lo a ni. Tin, Contract basis-a hnathawk tam ber te hi Rs. 40,000 hlawh tling lo te an nih avangin a huam lo bawk ang.

4. Hlawh hrensak hian Health Department leh Police Department hnuaia Group B, Group C leh Group D te chu a huam dawn lo a ni.