Indian currency note cheng 500 leh 1000 tih thih avanga Mizorama bank hrang hranga pawisa indaih lohna chungchangah vawiin khan Finance Minister Pu Lalsawta hovin RBI leh Mizoram chhunga Bank awm zawng zawng te bakah Post office hotu ten Secretariat conference hall-ah meeting pawimawh tak an nei a. Bank hrang hrang te dinhmun thlir hovin Bank leh mipui ten harsatna an tawh te sukiang tura ruahmanna te sawi ho a ni.

Cheng 500 leh 1000 note tih thih chungchanga India sorkar hmalakna chu Pu Lalsawta chuan hmalakna fing leh ram hnuk khawih tak meuh a nih avangin hun eng emaw chhung chu hei hian ram pumah nunphung pangngai a ti buai lo thei lo va. Hemi chhung hian Bank zawng zawng te chuan RBI thupek te an zawm vek tur a ni, a ti a. State chhungah cheng 100 note leh a hnuai lam leng vel a tam a, sum indaihlohna tikiam turin heng pawisa note tenau zawk te hi tumahin hreng bet lova, hmang chhuak zung zung turin mipui a ngen a ni. Pu Sawta chuan ramin hun khirh a paltlang mek lai hian Bank te chu thingtlang lama mipuite ngai pawimawh turin a chah a. A bik takin SBI chu RBI sum vawngtu an nih angin mipui te harsatna hre reng a, bank dang te tan inhawng taka an sum dawn te semzai turin a chah a ni.

Meeting-ah hian Bank ten tuna harsatna an tawh hrang hrang te report in heng harsatna sutkianna tur kawng te sawi ho a ni a. Hetih rual hian Finance department chuan India ram pum dinhmun uluk takin darkar tin a ngaichang reng a. Finance Minister chuan ram pum hmakhua atan India sorkar hmalakna in hun eng emaw chhung harsatna a thlen te chu dawhthei taka nghak turin mitin a ngen a ni.