Vawiin khan Finance Minister Pu Lalsawta chuan  Consumer Protection & Welfare tih thupui hmanga National Workshop, Indian Institute of Public Administration, New Delhi leh Institute of Indian Language and Literature (Premchand-Peeth), Aizawl tangkawp buatsaih, Tourist Lodge, Aizawla neih chu khuallian niin a hmanpui.

Pu Lalsawta chuan sawrkar sum hmuhna lian ber chu chhiah a ni a, sumdawngte thil zawrh leitu consumer-te hi ram hnuk tak tak an ni, a ti a. Bungrua engpawh kan lei apiangin chhiah kan chawi a, hunbi neiin kan chhiah chawi chu sumdawngte hian sawrkarah an chhung lut thin tiin Finance Minister chuan chhiah petu dik tak kan ni zawk tih mipuiin kan hriatchian a ngai a ni, a ti. Consumer-te dikna chanvo humhalh turin hetiang lama mi thahnemngaiten hun engemawchen an lo beih tawhna azarah Mizoramah consumer-te kan zalen sawt hle a, chutihrualin consumer-te humhalhna atana hmalakna hi a bul kan la tan chauh a, thui tak kan kal a la ngai a ni, a ti a.  Consumer-te dikna chanvo humhalh tura beihna hi awmlo ta se mahni hlawkna chauh ngaihtuah sumdawngten mipui min nek chep thei hle dawn a, chuvangin mipuite hian kan dikna chanvo kan hriata, consumer hamthatna leh humhimna ngaihven kawngah harh thar a tul hle tiin hemi puala workshop neih mek hian rah tha chhuah se a duh thu Pu Lalsawta chuan a sawi a ni. 

Centre for Consumer Studies, Indian Institute of Public Administration atangin workshop hmang tur hian Prof.Suresh Mishra leh Dr.Mamta Pathania bakah Institute of Indian Language & Literature atangin Prof.CE Jeen te an lo kal a. He workshop hi vawiinah bul tanin ni thum chhung a awh dawn a ni. Vawiin programme hi Dr.V.R.Ralte in kaihhruaiin Pu K.Laltuvela leh Prof.Suresh Mishra te hnen atangin thupui ngaihthlak a ni.